ILAWIL le xóolteʼ chuup yéetel le looloʼob bey xan yéetel le almendraʼoboʼ. U xóolteʼ Aarón. ¡Chéen upʼéel áakʼab ka xíit le looloʼob yéetel ka chʼúuy le takʼan almendraʼobaʼ! Koʼox ilik baʼaxten.

Le israelitaʼoboʼ tsʼoʼok u yúuchtal joʼopʼok u chéen máanoʼob teʼ x-tokoy luʼumoʼ. Yanoʼobeʼ maʼ tu chaʼik u nuʼuktaʼaloʼob tumen Moisés, yéetel maʼ utstutʼaanoʼob ka u beet u nojoch j-kʼiinil Aaroniʼ. Le máaxoʼob ku tuukuloʼob beyaʼ Coré, Datán, Abiram yéetel u láakʼ 250 u nuuktakil le kaajoʼ. Tuláakal leloʼobaʼ taaloʼobeʼ ka tiaʼaloʼob tiʼ Moisés: ¿Baʼaxten ka taaskaba nojchil tu yóokʼol le kaajaʼ?

Moisés túuneʼ tiaʼalaj tiʼ Coré yéetel tiʼ u j-tsaypachoʼob: Sáamaleʼ ka tsʼáaikeʼex incienso ta x-pʼuuluteʼexeʼ, ku tsʼoʼokleʼ ka taaleʼex tu tabernáculo Jéeoba, ka k-il máax ken u yéeye.

Ka sáaschaj túuneʼ, Coré yéetel u 250 j-tsaypachoʼobeʼ taaloʼob teʼ tabernáculooʼ. Yaʼab uláakʼ máakoʼob xan taaloʼob utiaʼal tsaypachtikoʼob. Jéeobaeʼ jach kʼuuxilnaji. Moisés túuneʼ tiaʼalaj: Náachkuntabaʼex tiʼ u yotoch le kʼasaʼan máakoʼobaʼ, maʼ machkeʼex mix baʼal utiaʼaloʼob. Le máakoʼob túunoʼ tu yuʼuboʼob tʼaan, ka tu náachkuntubaʼob tiʼ u pasel Coré, Datán yéetel Abiram.

Moisés túuneʼ tiaʼalaj: Yéetel le baʼax kun úuchlaʼ yaan a wilkeʼex máax kun yéeybil tumen Jéeoba. Le luʼumaʼ yaan u jeʼepajal utiaʼal ku lukʼ le kʼasaʼan máakoʼobaʼ.

Jach le ku tsʼoʼokol u tʼaan Moiseseʼ, le ku jeʼepajal le luʼumoʼ. U paseloʼob yéetel u nuʼukuloʼob Coré, Datán yéetel Abiram, bey xan uláakʼ máakoʼob tsaypachtoʼoboʼ, luʼukʼoʼob tumen le luʼumoʼ. Bey túun úuchik u muʼukloʼob tumen le luʼumoʼ. Le ka tu yuʼubaj le máakoʼob u sen awat le máaxoʼob táan u múukloʼoboʼ, ka tu awat aʼaloʼob: ¡Koʼoneʼex púutsʼul! ¡Bik xan u lukʼoʼon le luʼumoʼ!

Coré yéetel u 250 j-tsaypachoʼobeʼ láayliʼ tiʼ yanoʼob naatsʼ tiʼe tabernáculooʼ. Le oʼolaleʼ, Jéeobaeʼ tu beetaj u yéemel kʼáakʼ ka tu láaj tóokaj le máakoʼobaʼ. Ka tsʼoʼok túuneʼ Jéeobaeʼ tiaʼalaj tiʼ Eleazar, u paal Aaroneʼ, ka u chʼaʼa u x-pʼuulut le máakoʼob kíimoʼoboʼ utiaʼal ku beet upʼéel jajay lámina utiaʼal u pixik le altaroʼ. Le u piix túun le altaraʼ yaan u kʼaʼajsik tiʼ le israelitaʼoboʼ chéen Aarón yéetel u paalal yéeyaʼanoʼob tumen Jéeoba utiaʼal u beet u j-kʼiiniloʼob.

Jéeoba túuneʼ u kʼáat u jach eʼes tsʼoʼok u yéeyik Aarón yéetel u paalal utiaʼal u beet u j-kʼiiniloʼob. Le oʼolaleʼ tiaʼalaj tiʼ Moisés: U nuuktakil tuláakal chʼiʼibaleʼ u taas u xóolteʼ. U chʼiʼibal Levieʼ, Aarón ken u taas u xóolteʼ. Ken tsʼoʼokok túuneʼ ka tsolik tuláakal le xóolteʼob teʼ tabernáculo tu táan u baʼascheʼi le nuptʼaanoʼ. U xóolteʼ le máax in yéeymaj utiaʼal u beet u j-kʼiinileʼ yaan u loolankil.

Le ka sáaschaj túuneʼ, Moiseseʼ tu yilaj, ¡tu xóolteʼ Aaroneʼ xíit le looloʼobaʼ yéetel chʼúuy le takʼan almendraʼobaʼ! ¿Táan wa wilik túun baʼaxten Jéeobaeʼ tu beetaj u loolankil u xóolteʼ Aarón?