Historia 39

Vara stiʼ Aarón ribee guieʼ

BIIYAʼ ca guieʼ ne ca almendra güi ni cagaa lu vara riʼ. Vara stiʼ Aarón nga. ¡Ca guieʼ riʼ ne ca cuananaxhi güi ca bigaa cani ti gueelaʼ si! Guidúʼyanu xiñee.

Ca israelita ca maʼ guzácabe stale dxi lu desiertu. Caadxi de laacabe qué guni crecaʼ pa Moisés nga naquiiñeʼ gaca xaíque, nin pa Aarón nga naquiiñeʼ gaca xaíque stiʼ ca ni ruzaaquiʼ guʼxhuʼ. Tobi ni riníʼ ique zacá nga Coré, ne zaqueca Datán, Abiram ne 250 xaíque guidxi. Guirácabe reedacabe ne rábicabe Moisés: Xiñee cuquiibuʼ lii luguiadu pue.

Moisés na rabi Coré ne cani nanda laa: Guixíʼ siadóʼ laguicaa braseru stitu ne la uguu guʼxhuʼ rindáʼ naxhi ndaaniʼ cani, ne óraque lataʼ ra nuu tabernáculo stiʼ Jiobá. Gúʼyanu tu cuibe.

Sti dxi que Coré ne ca 250 ni nanda laabe que la? reedacabe ra nuu tabernáculo que. Stale tu reeda para gacané laacabe. Jiobá cadxiichipeʼ. Laguixeleʼ de ca yoo stiʼ ca hombre malu ca, na Moisés. Cadi cánatu gastiʼ stícabe. Ca binni que rucaadiágacaʼ, ne rixálecaʼ de ca yoo stiʼ Coré, Datán ne Abiram.

Óraque na Moisés: Pur ndiʼ nga zánnatu tuu nga ribí Jiobá. Guidxilayú riʼ zaxeleʼ ni ne zábini ca hombre malu riʼ.

Biluxe guníʼ si Moisés la? bixeleʼ guidxilayú, yoo que ne guiráʼ ca stiʼ Coré, Datán ne Abiram ne cani nuuné laacabe la? riábacaʼ ndaaniʼ ni, ne óraque ridaaguʼ ni luguiácabe. Ora ca binni que runadiágacaʼ ridxi stiʼ cani ziyaaziʼ que la? bicaacabe ridxi: ¡Laguxooñeʼ! ¡Guidxilayú ca zándaca gábini ne laanu!

Coré ne ca 250 ni nanda laabe nuurucaʼ gaxha de tabernáculo que. Nga runi Jiobá ruseendaʼ gui, ne guirácabe riáʼquicabe. Óraque na Jiobá rabi Eleazar xiiñiʼ Aarón de que guicaabe ca braseru stiʼ ca gueʼtuʼ que ne guninebe cani ti lámina para guirenda altar que. Lámina stiʼ altar riʼ la? riquiiñeʼ ni para ganna ca israelita de que Aarón si ne ca xiiñiʼ nga naquiiñeʼ guni dxiiñaʼ de ni ruzaaquiʼ guʼxhuʼ para Jiobá.

Peru Jiobá racalaʼdxiʼ gusihuinni de que gulibe Aarón ne ca xiiñiʼ casi ni ruzaaquiʼ guʼxhuʼ. Ngue runi rábibe Moisés: Ti xaíque de cada tribu stiʼ Israel guedané vara stiʼ. Lu tribu stiʼ Leví la? Aarón guedané vara stiʼ. Óraque guluu cada vara ndaaniʼ tabernáculo nezalú guiña stiʼ pactu ca. Vara stiʼ hombre ni naa guliéʼ casi ni ruzaaquiʼ guʼxhuʼ la? zabee guieʼ.

Ora riguuya Moisés cani sti siadóʼ que la? ¡lu vara stiʼ Aarón riree ca guieʼ riʼ ne ca cuananaxhi güi ca! Ruuyuʼ yanna xiñee biʼniʼ Jiobá de que vara stiʼ Aarón cuee guieʼ la?

Números 16:1-49; 17:1-11; 26:10.