Ododo 40

Moses Ogoyo Pata Got

MWAKA bino ci kato, bino ci kato—mwaka 10, mwaka 20, mwaka 39! Luicrael onongo pud gitye i dye tim. Ento i mwaka magi ducu Jehovah ogwoko jone. En opitogi ki manna. En onongo telogi i dyeceng ki wir me pol, i dyewor ki wir me mac. Dok i mwaka magi ducu bongogi pe oti dok tyen-gi bene pe orobbe bur.

Man aye obedo dwe me acel i mwaka me 40 i nge a ki Ejipt. Luicrael dok gugony i Kadec. Man aye kabedo ma onongo gitye iye mwaka 40 i ngec i kare ma kicwalo lurot piny 12 me cito ka roto lobo me Kanaan. Miriam lamin Moses oto i Kadec. Dok calo kit macon ca, ayela tye kany.

Lwak onongo pe gitwero nongo pii. Pi meno gukok bot Moses ni: ‘Onongo kono obedo ber makato ka onongo dong wato woko. Pingo ikelowa ki Ejipt i kabedo man marac tutwal ma gin mo pe dongo iye-ni? Bel mo pe, oduro mo pe, olok mo pe, pomegranat mo pe. Kadi pii amata mo bene peke.’

I kare ma Moses gin ki Aron guo i kema ka lega, Jehovah owaco ki Moses ni: ‘Cok lwak ducu kacel. Ci ki i nyimgi ducu in ilok ki pata got ca-ni. Pii madwong bikatti ki iye maromo lwak kacel ki leegi ducu.’

Pi meno Moses oguro lwak kacel, ci owaco ni: ‘Wuwiny ba, wun jo ma pe wugeno Lubanga! Omyero wan ki Aron aye wakel pii piwu ki i pata got man?’ Cutcut Moses ogoyo pata got ca kiryo ki odoo, ci pii ocorre madwong adada ki i pata got. Pii tye ma oromo jo ducu kacel wa ki leegi bene.

Ento Jehovah okeco i kom Moses gin ki Aron. In ingeyo pingo? Pien Moses gin ki Aron guwaco ni gin aye gibikelo pii ki i pata got. Ento i adane Jehovah gire aye okelo. Dok pien Moses gin ki Aron pe gutito lok ada i kom gin man, Jehovah owaco ni ebipwodogi. En owaco ni: ‘Pe wubitelo jona me donyo i Kanaan.’

Cutcut i ngeye Luicrael guweko Kadec. I nge kare manok gin guo i te Got Kor. Aron oto kany, i wi got. I kare me tone en onongo tye ki mwaka me ditte 123. Luicrael cwinygi oton tutwal, ci gin gukoko Aron pi nino 30. Wode Eleajar odoko lalam dog madit me Icrael.

Wel 20:1-13, 22-29; Nwoyo Cik 29:5.