ISRAELITANAKAX wasarankasipkakïnwa. ¡10 mara, 20 mara, 30 mara, 39 maraw pasxäna! Ukampis Jehová Diosaw sum uñjaskäna. Maná manqʼayäna. Uruxa mä qinayampiw thak uñachtʼayäna, arumasti ninampirakiw qhantʼayäna. Isipas janiw thanthaskänti, kayunakapas janiw uskänti.

Egiptot mistunipkäna uka maratxa 40 maraw pasxäna, nayrïr phaxsinkxapxänwa. Ukat wasitampiw Cades sat wasarar kuttʼanxapxäna. 12 uñaqirinak Canaán markar khitkäna uka maratxa 40 maraw pasxäna. Moisesan María kullakapax uka Cades wasaranwa jiwxäna. Ukat wasitampiw nayrjama jan waltʼäwinakax utjxarakikïna.

Um jan utjipanxa akham sasaw Moisesar sapxäna: ‘Janis jakxasäna walipunisapänwa. ¿Kunatakis Egiptot irpsunipxista jan yapuchañjam axsarkañ wasararuxa? Akansti janiw higosa, ni uwas yapunakasa, ni granado quqanakasa utjkiti; ni umas umtʼañatak utjkiti’ sasa.

Ukat kunapachatï Moisesampi Aaronampix yupaychañ utaru Diosar mayisir sarapxäna ukhaxa, Jehová Diosax akham sänwa: ‘Markpachar jawsthapma. Ukat taqi jaqinak nayraqatanxa khä qullu qarqar parlma. Ukatxa umaw mistuni jupanakan ukhamarak uywanakapan umtʼapxañapataki’ sasa.

Ukhamasti Moisesax taqiniruw jawsthapïna, ukat akham sänwa: ‘¡Istʼapxam Diosar jan iyawsir jaqinaka! ¿Aka qarqatti Aaronampi nayampix um apsurapipxäma?’ sasa. Uk sasinxa, qullu qarqaruw Moisesax pä kut jawqʼatatäna, ukatxa wal umax chhixsunïna. Taqinitakiw umax utjäna uywanakapatakis ukhamaraki.

Ukampis Jehová Diosax Moisesampi Aaronampitakiw colerasïna. ¿Kunatsa? Kunattix Moisesampi Aaronampix nanakaw uma apsurapipxäma sapxänwa. Ukampis Jehová Diosaw umxa apsuskäna. Ukham jan chiqap parlatanakamatxa juchañchatäpxätaw sasaw Jehová Diosax säna. ‘Janiw jumanakax markajarux Canaán uraqir irpantapkätati’ sarakïnwa.

Cadesat israelitanakax mistxasinxa Hor sat qulluruw puripxäna. Ukanwa Aaronax jiwxäna. 123 maraniw jiwxäna. Israelitanakax wali llakitaw jikxatasipxäna, Aaronan jiwatapatxa phaxsiw jachapxäna. Aaronan Eleazar sat yuqapawa Israel markataki jilïr sacerdotjam uttʼayatäxarakïna.