!PLANTE yia oli pas — 10 yia, 20 yia, 30 yia, 39 yia! Ol man Isrel oli stap yet long drae ples. Be long olgeta yia ya, Jeova i lukaotgud long ol man blong hem. Hem i givim mana long olgeta blong oli kakae. Long dei, hem i lidim olgeta wetem wan klaod, mo long naet, hem i lidim olgeta wetem wan faea we i stanap stret. Long olgeta yia ya, ol klos blong olgeta oli no brobrok, mo ol leg blong olgeta oli no solap.

Long faswan manis blong namba 40 yia we oli aot long Ijip, ol man Isrel oli putum ol haos tapolen blong olgeta long Kades bakegen. Hemia sem ples we oli bin stap long hem klosap 40 yia bifo, taem Moses i sanem ol 12 spae blong oli lukluksave kantri blong Kenan. Naoia, Meriam, sista blong Moses, i ded long ples ya. Mo wan trabol i kamaot olsem i bin kamaot long faswan taem we oli stap long ples ya.

Ol man Isrel oli no moa gat wota. Oli toktok tumas, oli talem long Moses se: ‘I moagud sipos mifala i ded finis. ?From wanem yu yu tekemaot mifala long Ijip, blong mifala i kam long ples ya? Ples ya i wan rabis ples olgeta. I no gat wan samting nating i save gru long hem. I no gat wit, i no gat fig, i no gat grep, i no gat grenadin. Mo naoia, i no gat wota blong dring.’

Taem Moses mo Eron tufala i go long tabenakel blong prea, Jeova i talem long Moses se: ‘Yu mas singaot ol man Isrel oli kam wanples. Ale, long fes blong olgeta, bambae yu tok long ston ya longwe, mo bambae wota i sut i kamaot long hem, i kam long olgeta wetem ol anamol blong olgeta blong oli save dring.’

Ale, Moses i singaot ol man Isrel oli kam, mo hem i talem se: ‘!Yufala i lesin! !Oltaem yufala i no trastem God! ?Olsem wanem? ?Mitufala i mas mekem wota i kamaot long ston ya blong yufala i dring?’ Ale, Moses i leftemap wokingstik blong hem, i kilim bigfala ston ya tu taem, nao bigfala wota i sut i kamaot, mo olgeta man wetem ol anamol blong olgeta oli stap dring.

Be Jeova i kros long Moses mo Eron. ?From wanem? From we tufala i bin talem se tufala ya nao oli mekem wota ya i kamaot long ston. Be Jeova nomo i mekem samting ya. Moses mo Eron i no talem trutok long saed ya. From samting ya, Jeova i talem se bambae hem i panisim tufala: ‘Bambae yutufala i no save lidim olgeta oli gotru long ples ya Kenan we mi mi promes blong givim long yufala.’

Smoltaem biaen, ol man Isrel oli lego Kades. Oli wokbaot i go smol, nao oli kasem Hil ya Horo. Antap long hil ya, Eron i ded. Hem i gat 123 yia blong hem. Ol man Isrel oli harem nogud tumas, oli krae long Eron blong 30 dei. Nao Eleasara we i pikinini blong Eron, i kam hae pris long nesen blong Isrel.

Namba 20:1-13, 22-29; Dutronome 29:5.