SAAN 10, saan 20, saan 30 ani saan 39 tɛmɛna, nka Israɛldenw bele be kongokolon kɔnɔ! O saanw bɛɛ kɔnɔ, Jehova y’a ka mɔgɔw ladon. A y’u balo ni maanɛ ye. Tile fɛ, a tun b’u ɲɛminɛ ni sankaba ye ani sufɛ a tun be yeelen bɔ u ye ni tasuma ye. O saanw bɛɛ kɔnɔ, u ka faniw ma faran ani u seenw ma funu.

Kabi u bɔra Misira, a saan 40nan kalo fɔlɔ filɛ sisan. Israɛldenw nana sigi kokura Kadɛsi. A saan 40 ye nin ye u tun sigira yen tuma min na Musa ye kolajɛbaga 12 ci ka taga Kanaan jamana lajɛ. Musa balimamuso Miriyamu sara Kadɛsi. I n’a fɔ fɔlɔ la, Israɛldenw ye gwɛlɛya sɔrɔ tugun Kadɛsi.

U ma jii foyi sɔrɔ yen. O kama, u ŋunuŋununa Musa kama ko: ‘ N’an tun sara, o tun ka fisa. Mun na aw bɔra n’an ye Misira ka na n’an ye yɔrɔjugu nin na? Foyi tɛ falen yan, suman tɛ yan, torosun tɛ yan, ɛrɛzɛnsun tɛ yan ani gerenadiyiri tɛ yan. Jii minta yɛrɛ tɛ yan!’

Tuma min na Musa ni Arɔn tara Jehova deliyɔrɔ ɲɔgɔnkubɛn fanibugu kɔnɔ, a y’a fɔ Musa ye ko: ‘Jama lajɛn. I ka kuma farakuru nin fɛ u bɛɛ ɲɛɛ na. Jii caaman bena bɔ a kɔnɔ k’a di jama ni u ka bɛgɛnw bɛɛ ma u k’a min.’

O la, Musa ye jama lajɛn k’a fɔ ko: ‘Aw mɔgɔ dannabali nunu, aw ka lamɛnni kɛ! Yala ne ni Arɔn ka kan ka jii bɔ aw ye farakuru nin le kɔnɔ wa?’ O kɔ, Musa ye farakuru gosi siɲɛ fila n’a ka bere ye, jii poyira ka bɔ caaman. Jama ni bɛgɛnw bɛɛ y’a min ka fa.

Nka, Jehova dusu dimina Musa ni Arɔn kɔrɔ. I b’a lɔn fɛɛn min kama wa? Musa ni Arɔn y’a fɔ ko olu lo bena jii bɔ farakuru la. Nka tiɲɛn na, Jehova lo y’a kɛ jii bɔra farakuru la. Komi Musa ni Arɔn ma tiɲɛn fɔ o koo la, Jehova y’a fɔ u ye ko a bena u ɲangi. A ko u ma: ‘Aw tɛna ne ka jama ɲɛminɛ ka don Kanaan jamana na.’

A ma mɛɛn, Israɛldenw bɔra Kadɛsi. Dɔɔni o kɔ, u sera Ɔri kulu ma. Arɔn sara yen Ɔri kulu kun na, a saan 123nan na. Israɛldenw dusu kasira kosɔbɛ, u bɛɛ ye Arɔn suu kasi tile 30 kɔnɔ. A dencɛ Eleyazari kɛra Israɛl ka sarakalasebaga kuntigi kura ye.