SA OTI oqo e 39 na yabaki era se tiko ga na Isireli ena vanua liwa. Ia ena gauna kece oqori e kauaitaki ira tiko ga o Jiova. E vakani ira ena mana qai liutaki ira ena duru o ena siga kei na duru bukawaqa ena bogi. E sega vakadua ni bau madra na nodra isulu se mosi na yavadra ena gauna taucoko oqori.

Oqo se qai matai ni vula ni oti e 40 na yabaki nodra biuti Ijipita mai. Era mai tiko tale e Ketesa, na vanua era a talai mai kina na 12 na yamata ena 40 na yabaki yani i liu mera lai raici ira na kai Kenani. E mate tale ga e ke o Miriama na gane i Mosese. Me vaka ga e liu, e mai yaco na leqa ena vanua oqo.

Era vosa kudrukudru na tamata vei Mosese ni sega na wai: ‘E vinaka cake ga me keimami a mate. Na cava o kauti keimami tani kina mai Ijipita ina vanua ca oqo? E sega ni dua na ka e bula rawa kina. Sega na sila, na lolo, na vaini, qai sega na pomekaraneti. E sega tale ga na wai me gunuvi.’

A kaya o Jiova vei Mosese ni rau sa lai masu yani kei Eroni ena valeniveitavaki: ‘Vakasoqoni ira mai na tamata. Mo vosa ina vatu nira rai kece tu. Ena dave mai kina na wai me rauti kemuni kei na manumanu kece ga.’

E kumuni ira mai na tamata o Mosese, qai kaya: ‘Ni rogoca o kemuni na sega ni vakararavi tiko vua na Kalou! Me keirau kauta beka mai kei Eroni na wai ena vatu oqo vei kemuni?’ Sa qai samuta vakarua o Mosese na vatu. E dave mai kina vakalevu na wai. E rauti ira vinaka na tamata kei ira tale ga na manumanu.

E cudruvi Mosese kei Eroni vakalevu o Jiova. O kila na vuna? Nodrau kaya ni rau vakadavea na wai mai na vatu. Ia o Jiova a cakava na ka oqori. Ni rau a sega ni tukuna na ka dina, e kaya o Jiova ni na totogitaki rau. E kaya: ‘Drau na sega ni liutaki ira noqu tamata i Kenani.’

Sega ni dede ra sa biuti Ketesa na Isireli. Vakalailai ga era sa yaco yani ina Ulunivanua o Ori. A mate e keri o Eroni ni sa yabaki 123. Era rarawa vakalevu na Isireli, ra qai tagicaki koya me 30 na siga. Sa qai bete levu ena matanitu o Isireli na luvena tagane o Eliesa.