ALATÜSÜ 10, 20, 30, 39 juya otta na israeliitakana ayatüshii chaaʼaya isashiipaʼa. Naaʼinmajüin Jeʼwaa naya. Nikirüin maná, nuʼunirüin soʼukai süka wanee siruma otta saʼwai chuwatuuisü napüleerua. Nnojotsü ajaʼttüin nasheʼin otta nnojotsü jolotuin nooʼui.

Chashii naya nachikuaʼa Cades, 40 juya süchikijee noʼunuin Egiptojee. Cades shia eejanale naya wanaa sümaa najütünüin 12 ajayajülii Canaánmüin. Ouktusü Míriam tü nuwalakat Moisés Cades otta alatüsü kasa mojusü chaaʼaya.

Nnojotsü wüin napüla na wayuukana, mojuka nanüiki nümüin Moisés, namaka: ‹Anashiijee ouktule waya. ¿Jamüshii puʼuniraka waya Egiptojee süpüla püntirüin waya eere nnojoluin eküülü? Nnojotsü süchon wunuʼu ekünaajuui yaaya, nnojotsü wüin wasüinjatü›.

Chapa Moisés otta Aarón suluʼu tü aʼwaajüleekat, nümaka Jeʼwaa nümüin Moisés: ‹Puutkajeʼera na israeliitakana, paashajaa noʼupala sümüin tü ipa yalakat yala. Ojuʼiteerü wüin suluʼujee süpüla nasüin na wayuukana otta na mürütkana›.

Nuutkajeʼeraka Moisés napüshuaʼa na israeliitakana, nümaka namüin: ‹¡Jaapaja jiakana nnojoliikana eʼitaain jaaʼin nünain Maleiwa! Ayuʼluinjachi taya wüin nümaa Aarón suluʼujee tü ipakat›. Nütaitaka Moisés piantua tü ipakat süka nunuʼuse, sujuʼitaka wüin suluʼujee napüla na wayuukana otta na mürütkana.

Jashichika Jeʼwaa nümüin Moisés otta Aarón. ¿Pütüjaa aaʼu jamüshi jashichika nia? Süka niainjachin Moisés otta Aarón ayuʼlaka wüin suluʼujee tü ipakat naashin. Chi ayuʼlakai nia Jeʼwaa. Süka nnojoluin naküjüin tü shiimainkat nümaka Jeʼwaa: ‹Nnojoishii nayainjanain antirüin na israeliitakana Canaánmüin›.

Mapa noʼunaka na israeliitakana Cadesjee. Nantaka eemüin tü uuchikat Hor, eere ouktuin Aarón. 123 nuuyase wanaa sümaa ouktuin nia. Mojusü maʼin naaʼin na israeliitakana, naʼyalajaka soʼu 30 kaʼi. Niaka laülaain napüleerua na sacerdotekana Eleazar, chi nüchonkai Aarón.