OHASA heta áño... 10, 20, 30, 39 áño! Ha umi isrraelíta oĩ gueteri pe desiértope. Péro entéro umi áño ohasavaʼekuépe, Jehová oñangareko ipuévlore. Omeʼẽ chupekuéra maná hembiʼurã. Arakuépe ogia chupekuéra peteĩ kolúmna araiguigua rupive, ha pyharekue katu oiporu peteĩ kolúmna tataguigua. Ha ijaokuéra noñembyaíri ni ndahasýi chupekuéra ipy.

Ohasáma 40 áño umi isrraelíta osẽhague Egíptogui ha oĩma hikuái pe primer méspe. Haʼekuéra koʼág̃a oĩ jey Qadéspe. Koʼápe oĩmavaʼekue hikuái umi 12 espía ohórõ guare omaña ñemi Canaánpe. Upéva ojapóma 40 áño rupi. Míriam, Moisés ermána, omano Qadéspe. Ha ymaguaréicha, oĩ avei provléma koʼápe.

Umi hénte ndotopái y, ha upévare heʼi Moiséspe: ‘Iporãvevaʼerãmoʼã romanombárire. Mbaʼére piko orerenohẽ Egíptogui oregueru hag̃ua ko lugár vaietépe, okakuaaʼỹhápe mbaʼeve? Koʼápe ndaipóri kóga hiʼáva, ígo, parrál, ni granáda. Ni y ndaipóri jayʼu hag̃ua’.

Ohóvo Moisés ha Aarón oñemboʼe hag̃ua tavernákulope, Jehová heʼi Moiséspe: ‘Embyaty pe puévlo. Upe rire, enterove renondépe eñeʼẽ pe ita upépe oĩvape. Upégui osẽta heta y hoyʼu hag̃ua umi hénte ha hymbakuéra’.

Upe rire Moisés ombyaty umi héntepe, ha heʼi: ‘Pehendu, peẽ ndapejeroviáiva Ñandejárare! Aarón ha che piko roguenohẽvaʼerã peẽme y ko itágui?’. Upémaramo, Moisés oinupã pe ita dos vése peteĩ yvyrápe, ha oñepyrũ ochororo chugui heta y. Oĩ y enterove hénte ha animalkuérape g̃uarã.

Péro Jehová ipochy Moisés ha Aarón ndive. Ndépa reikuaa mbaʼérepa? Pórke Moisés ha Aarón heʼi haʼekuéra oguenohẽtaha y pe itágui. Péro añetehápe Jehová ojapo upéva. Moisés ha Aarón nomombeʼuihaguére pe añetegua, Jehová heʼi okastigataha chupekuéra. ‘Ndahejamoʼãi pemoinge che puévlo Canaánpe’, heʼi Ñandejára Jehová.

Umi isrraelíta voi osẽ jey Qadésgui. Upe riremínte og̃uahẽ hikuái mónte Hórpe. Upépe, pe montáña ruʼãme, omano Aarón. Haʼe oguereko 123 áño omanórõ guare. Umi isrraelíta ombyasyeterei, ha 30 día aja hasẽ hikuái Aarónre. Upe rire itaʼýra Eleazar opyta saserdóte guasúramo Israélpe.