Moses ma tono oruuwa
EHUNGI 40
Moses ma tono oruuwa
OZOMBURA nozombura za kapita okutja ozombura 10, ozombura 20, ozombura 30, ozombura 39! Ovaisrael ngunda ve ri mokuti onguza. Nungwari mozombura azehe nḓa Jehova wa tjevera ovandu ve. Eye we ve pa omana. Eye we ve hongorera nongunḓe yotjikamba mutenya, nongunḓe yomuriro ouṱuku. Nu oure wozombura azehe nḓa ozombanda zawo kaaze kurupa nozombaze zawo kaaze hihamwa.
Nambano imbwi omueze omutenga wombura oitja-40 kombunda yaindu tji va za nokupita moEngipte. Owo va tona ozondanda moKades rukwao. Imba opu va ri indu ozohoze 12 tji va hindirwe kehi raKanaan ape ozombura 40 komurungu wanao. Omuṱena waMoses Miriam wa ṱira moKades. Otja tji pa ri rutenga, imba pe noumba.
Ovandu kava ri amave munu omeva kaparukaze. Kunao owo va unaunina Moses nave tja: ‘Atja rira kokuwa andakuzu twa koka. Mwe tu pitisira tjike moEngipte nokutueta poṋa opavi mba pupe ha hapa otjiṋa? Opo kape hapa ovikokotwa, omakuyu, omandjembere nozondenya. Nangarire omeva okunwa kaye po.’
Indu Moses na Aron tji va ya kondanda yOmahakaeneno okukakumba, Jehova wa raera Moses: ‘Woronganisa ombongo. Nu komurungu wawo avehe hungira noruuwa ndu ri mbena. Okutja mamu piti omeva nga yenene kovandu na kovinamuinyo.’
Kunai Moses wa woronganisa ovandu, na tja: ‘Purateneye, eṋe mbu mu ha kambura mu Mukuru! Ami na Aron ngatu mu pitisire omeva moruuwa ndwi?’ Okuzambo Moses wa tona oruuwa povikando vivari nokati, nu mwa pupa omeva omengi. Opo pa ri nomeva omengi kovandu avehe na kovinamuinyo okunwa.
Nungwari Jehova wa pindikira Moses na Aron. Ove mo tjiwa kutja omena ratjike? Omena rokutja Moses na Aron va tjere owo ombu mave pupisa omeva okuzira moruuwa. Nungwari mouatjiri Jehova ongwa tjita nao. Nu mena rokutja Moses na Aron kave hungirire ouatjiri ohunga na ihi, Jehova wa tja eye me ve vere. Eye wa tjere: ‘Eṋe kamu nakuhitisa otjiwaṋa tjandje mu Kanaan.’
Okuzambo Ovaisrael va pita mu Kades. Kombunda yokaruveze okasupi owo ve ya pondundu Hor. Imba, kombanda yondundu, Aron opa ṱira. Eye wa ṱa nozombura 123. Ovaisrael va ri noruhoze tjinene, okutja ve mu tjitira omutambo oure womayuva 30. Omuzandu we Eleasar we mu pingena otjomupristeri omunene wotjiwaṋa tjaIsrael.
