NAGLABAS ti adu a tawen. Ket dagiti Israelitas addada pay laeng idiay let-ang. Ngem kadagitoy amin a tawen tinaraonan ni Jehova ti ilina iti mana. Itontonna ida iti aldaw babaen ti mommon nga ulep, ken iti rabii babaen ti mommon nga apuy. Ket kadagitoy a tawtawen di pulos nagrunot ti badbadoda ken di nagsakit ti saksakada.

Isut’ umuna a bulan itan iti maika-40 a tawen nanipud ipapanawda idiay Egipto. Nagkampo manen dagiti Israelitas idiay Cades. Daytoy idi ti ayanda idi naibaon ti 12 nga espia a mangsimisim ti daga ti Canaan ngangngani 40 a tawenen sakbayna. Ni Miriam a manang ni Moises ti natay idiay Cades. Ken adda manen ti riribok ditoy.

Saan a makasapul dagiti tattao ti danum. Gapuna nagreklamoda ken Moises: ‘Nasaysayaat koma pay no nataytayon. Apay nga inruarnakami manipud Egipto iti daytoy nagdakes a lugar?’

Napan da Moises ken Aaron idiay tabernakulo nga agkararag. Kuna ni Jehova ken Moises: ‘Urnongem dagiti tattao. Ket iti sanguananda amin agsaoka iti daydiay a bato. Addanto rummuar a nawadwad a danum para kadagiti tattao ken amin nga an-animalda.’

Gapuna inurnong ni Moises dagiti tattao ket kinunana: ‘Denggenyo, awan talekyo iti Dios! Siak ken Aaron yegandakayo kadi ti danum iti daytoy a bato?’ Ket pinang-or ni Moises ti bato a namindua iti bastonna. Rimmuar ti nawadwad a danum para amin a tattao ken an-animal nga inumenda.

Ngem nakapungtot ni Jehova kada Moises ken Aaron. Ammom kadi no apay? Ngamin ta kuna da Moises ken Aaron nga isuda ti mangyeg ti danum manipud iti bato. Ngem kinapudnona ni Jehova. Gapu ta di imbaga da Moises ken Aaron ti pudno iti daytoy, dinusa ni Jehova ida. Kunana: ‘Dikayto iturong ti ilik a sumrek iti Canaan.

Di nagbayag pinanawan dagiti Israelitas ti Cades. Idi kuan nakadanonda idiay Bantay Hor. Ditoy a natay ni Aaron idi agtawen ti 123. Lumdaang dagiti tattao. Iti 30 nga al-aldaw dinung-awanda ni Aaron. Ni Eleazar nga anakna ti simmaruno kas nangato a padi ti Israel.