MĨAKA nĩyaendeeie na kũvĩta—yavĩta myaka 10, myaka 20, myaka 30, na myaka 39! Na Aisilaeli maĩ o weũnĩ. Ĩndĩ myaka ĩsu yonthe Yeova nowasũvĩie andũ make. Nĩwamanengae lĩu weetawa mana. Mũthenya amatongoeasya na kĩtuĩ kya mũumbĩ na ũtukũ kĩtuĩ kya mwaki. Na ĩvinda ya myaka ĩsu yonthe ngũa syoo iyaakũa na maaũ moo mayaaimba.

Yu nĩ mwei wa mbee wa mwaka wa 40 kuma yĩla maumie Misili. Na ĩngĩ Aisilaeli nĩmambie maeema Katesi. Vau nĩvo maĩ yĩla ala athiani 12 matũmiwe makathiane nthĩ ya Kanaani ta myaka 40 mĩthelu. Miliamu, mwĩĩtu-a-inyia wa Mose akw’ĩĩe Katesi. Na o tondũ kweethĩiwe ĩvinda yĩla yĩngĩ maĩ vaa, yu ve na thĩna.

Andũ mayaĩ matonya kũkwata kĩw’ũ. Kwoou manyungunyĩĩsya Mose mayasya: ‘Twenda kethĩwa nĩtwakwie. Nũndũ wa kĩ watumisye Misili watũete vandũ vaa vathũku vatamea kĩndũ? Vai mbeũ, vai makũyũ, vai nzavivũ, na vai makũngũmanga. O na vai kĩw’ũ kya kũnyw’a.’

Yĩla Mose na Aluni maendie ĩeemanĩ ya kũmbanĩa kũvoya, Yeova eea Mose: ‘Ũmbany’a andũ vamwe. Na vu mbee woo neena na ĩvia yĩya yĩ vaaya. Kĩw’ũ kĩtoetye kĩkauma nthĩnĩ wayo kwondũ wa andũ na indo syoo.’

Kwoou Mose oombany’a andũ, na asya: ‘Ĩthukĩĩsyei, inyw’ĩ mũtamũĩkĩĩaa Ngai! Nyie na Aluni nĩtũũmumĩsya kĩw’ũ ĩvianĩ yĩĩ?’ Na ĩndĩ Mose akũna yĩla ĩvia kelĩ na ndata yake, na kĩw’ũ kingĩ kyauma. Vaĩ na kĩw’ũ kĩtoetye kya kũnyuwa nĩ andũ na indo.

Ĩndĩ Yeova nĩwathatiw’e nĩ Mose na Aluni. We nĩwĩsĩ nĩkĩ? Kĩtumi nũndũ Mose na Aluni maisye nĩmo mekumĩsya andũ kĩw’ũ ĩvianĩ. Ĩndĩ kwa w’o nĩ Yeova weekie ũu. Na nũndũ Mose na Aluni mayaatavya andũ ũ w’o ĩũlũ wa ũndũ ũsu, Yeova asya nũkũmasilĩla. Kwoou amea: ‘Mũikatongoesya andũ makwa mũmalikye Kanaani.’

O mĩtũkĩ Aisilaeli nĩmaumie Katesi. Na ĩtina wa ĩvinda ĩkuvĩ mavika Kĩĩmanĩ kya Olu. Na vau kĩĩmanĩ ĩũlũ, Aluni akw’a. Akwie ena ũkũũ wa myaka 123. Aisilaeli nĩmeewie kĩũũyũ mũno, na kwoou andũ onthe mamũmetea Aluni kwa mĩthenya 30. Na mwana wake Eleasali atw’ĩka mũthembi mũnene wa mbaĩ ya Isilaeli.

Motalo 20:1-13, 22-29; Kũtũngĩlĩlwa Kwa Mĩao 29:5; Neemia 9:21.