KINUMEʼK 10 chihabʼ, 20 chihabʼ, 30 chihabʼ ut 39 chihabʼ ut ebʼ laj Israel toj wankebʼ saʼ li chaqichʼochʼ. Chiruhebʼ li chihabʼ aʼin, li Jehobʼa kixkʼaakʼale li xtenamit ut kixkʼe choʼq xtzakahemq li mana. Chiru li kutan kixbʼeeresihebʼ rikʼin choql ut chiru li qʼoqyink rikʼin xaml. Inkʼaʼ kiʼosoʼk li raqʼebʼ chi moko kirahoʼk ta li roqebʼ.

Anaqwan yookebʼ xtikibʼankil 40 chihabʼ relikebʼ Egipto. Ebʼ laj Israel keʼsutqʼiik saʼ li naʼaj Qades. Arin wankebʼ naq laj Moises kixtaqla 12 chi winq chi rilbʼal li tenamit Canaan. Li xMiriam, ranabʼ laj Moises, kikamk saʼ li naʼaj Qades. Saʼ li naʼaj aʼin wank chʼaʼajkilal joʼ kiwank chaq najter.

Ebʼ laj Israel maakʼaʼebʼ xhaʼ. Joʼkan naq keʼok xyeebʼal re laj Moises: ‹Us raj xookamk. Kʼaʼut naq xooʼaawisi Egipto ut xooʼaakʼam chaq saʼ li chaqichʼochʼ? Inkʼaʼ nayoʼlaak ru li awimq saʼ li chʼochʼ aʼin. Chi moko wank ta haʼ›.

Naq laj Moises ut laj Aaron kohebʼ saʼ Rochoch li Jehobʼa chi tijok, li Yos kixye re laj Moises: ‹Chʼutubʼ li tenamit ut taawaatina li pek chiruhebʼ. Saʼ li pek aʼan t-elq chaq naabʼal li haʼ choʼq rehebʼ laj Israel ut ebʼ li xketomq›.

Joʼkan naq laj Moises kixchʼutubʼ li tenamit ut kixye rehebʼ: ‹Abʼihomaq, laaʼex li nekexweechʼink re li Yos. Laj Aaron ut laaʼin tqisi eehaʼ saʼ li pek aʼin›. Joʼkan naq laj Moises wiibʼ sut kixtochʼ li pek rikʼin li xxuqʼ. Tojaʼ naq nabʼulbʼutq chaq chi elk li haʼ. Anaqwan wank chik xhaʼ li tenamit ut ebʼ li ketomq.

Abʼan li Jehobʼa kichalk xjosqʼil rikʼin laj Moises ut laj Aaron. Ma nakaanaw kʼaʼut? Xbʼaan naq laj Moises ut laj Aaron keʼxye re li tenamit naq aʼanebʼ teʼisinq chaq re li haʼ ut inkʼaʼ keʼxye naq li Jehobʼa tbʼaanunq re. Joʼkan naq li Jehobʼa kixye rehebʼ: ‹Moko laaʼex ta texʼoksinq re lintenamit saʼ li naʼaj Canaan›.

Chirix chik aʼan ebʼ laj Israel keʼelk chaq Qades. Ut keʼwulak saʼ li tzuul Hor. Saʼ li tzuul aʼin kikamk laj Aaron naq wank 123 chihabʼ re. Kʼajoʼ naq keʼrahoʼk saʼ xchʼool ebʼ laj Israel naq kikamk laj Aaron! Keʼxyaabʼa chiru 30 kutan. Joʼkan naq laj Eleazar, ralal laj Aaron, kikanaak choʼq aj tij saʼ xyanqebʼ laj Israel.