MĨAKA igũrũ rĩa mĩaka nĩ mĩhĩtũku—mĩaka 10, mĩaka 20, mĩaka 30, mĩaka 39! Na Aisiraeli marĩ o werũ-inĩ. No ningĩ mĩaka ĩo yothe Jehova nĩamenyereire andũ ake. Aamaheaga mana. Mũthenya aamatongoragia na gĩtugĩ kĩa itu, na ũtukũ gĩtugĩ kĩa mwaki. Na mĩaka-inĩ ĩyo yothe nguo ciao itigana gũthira o na magũrũ mao matigana kũgĩa na ironda.

Mĩaka 40 kuuma moima Misiri-rĩ, rĩu ũyũ nĩguo mweri wa mbere. Rĩu ningĩ Aisiraeli makĩamba hema Kadeshi. Handũ haha no harĩa marũngiĩ rĩrĩa athigani 12 maatũmirũo magathigane bũrũri wa Kanaani ta mĩaka 40 mĩhĩtũku. Miriamu mwarĩ wa nyina na Musa agĩkuĩra Kadeshi. O rĩngĩ ningĩ, gũkĩgĩa na thĩna.

Andũ makĩaga maĩ. Magĩteta kwĩ Musa makiuga ũũ: ‘Na arĩ korũo nĩ gũkua twakuire. Nĩ kĩ gĩatũmire mũtũrute Misiri mũtũrehe kũndũ gũkũ kũũru gũtarĩ kĩndũ kĩngĩkũra? Gũtirĩ hĩndĩ, ngũyũ, kana thabibu, kana makomamanga. O na maĩ makũnyua gũtirĩ.’

Rĩrĩa Musa na Haruni maathire hekarũ-inĩ kũhoya-rĩ, Jehova akĩaria na Musa akĩmwĩra atĩrĩ: ‘Cokanĩrĩria kĩrĩndĩ gĩothe. Mũcoke mwarĩrie rũaro rũrũ rũa ihiga kĩĩ ho gĩkĩiguagĩra. Ruume maĩ makũigana andũ na ũhiũ wothe.’

Rĩu Musa agĩcokanĩrĩria andũ akĩmera: ‘Thikĩrĩriai, inyuĩ aremi aya! Anga no mũhaka Haruni na niĩ tũmũrutĩre maĩ ihiga-inĩ rĩrĩ?’ Musa agĩkĩgũtha ihiga rĩu na rũthanju maita merĩ, na maĩ maingĩ mũno magĩtherera. Nakĩo kĩrĩndĩ kĩu gĩkĩnyua hamwe na ũhiũ wakĩo.

Jehova nĩarakaririo nĩ Musa na Haruni. No ũmenye gĩtũmi nĩ kĩĩ? Nĩ tondũ Musa na Haruni moigire atĩ nĩmangĩamarutĩire maĩ ihiga-inĩ. Jehova nĩwe wekire ũguo. Na tondũ Musa na Haruni matiaririe ma ya ũhoro ũyũ-rĩ, Jehova akiuga atĩ nĩekũmaherithia. Ningĩ akiuga, ‘Mũtigatwara andũ akwa thĩinĩ wa Kanaani.’

Thutha hanini Aisiraeli makiuma Kadeshi. Kahinda kanini thutha ũcio magĩkinya Kĩrĩma-inĩ kĩa Horu. Igũrũ wa kĩrĩma kĩu, Haruni agĩkua. Aarĩ na ũkũrũ wa mĩaka 123 hĩndĩ ya gĩkuũ gĩake. Aisiraeli makĩnyitwo nĩ kĩeha mũno, na makĩrĩrĩra Haruni matukũ 30. Eleazaru mũrũwe agĩtuĩka mũthĩnjĩri-Ngai-mũnene wa kerĩ wa rũrĩrĩ rũa Isiraeli.