PAPICHILE myaka 39 bena Isalela saka bakijitu mu kiselebwa! Bino ino yonse myaka Yehoba walaminenga bantu banji. Wibajishishenga manna. Wibatangijilenga kimye kya mute na jikumbi, kabiji kimye kya bufuku na mujilo. Kabiji mu ino yonse myaka bonse bivwalo byabo kechi byatabaukilenga ne, kabiji maulu abo kechi avimbilenga ne.

Pano bajinga mu ñondo mutanshi mu mwaka wa bu 40 kufuma po bafumijile mu Ijipita. Kabiji bena Isalela babwelele jibiji baikala ku Kadeshi. Kuno ko ko bajinga kimye bamwendela ntanda 12 kyo batuminwe na kwendela ntanda ya Kenana myaka 40 saka iji pepi na kukwana. Milyama nyenga ya kwa Mosesa wafwijile ku Kadeshi. Kabiji byonkatu byo kyajinga patanshi ne luno kwajinga lukatazho.

Bantu bakankelwe kwa kutana mema nangwa acheche ne. Onkao mambo bejizhañenye kwi Mosesa amba: ‘Kyakonsheshe kuwama umvwe twafwiletu. Mambo ka o mwituletejile kufuma mu Ijipita kwiya ku ino mpunzha kwakonsha ne kubula kumena bintu ne? Kafwako kajo, nangwa makuyu, nangwa mañanzañanza, nangwa mapomegulanchi ne. Kabiji kafwakotu ne mema a kutoma ne.’

Mosesa ne Alona byo bayile na kulomba ku tente wa lusambakeno, Yehoba waambijile Mosesa amba: ‘Konkanya jibumba. Wijambile jibwe ku meso abo bonse jipane mema ajo. Musakufuma mema a kutomesha jibumba ne banyama babo.’

Kepo Mosesa akonkenye bantu ne kwamba’mba: ‘Umvwai pano, anweba mwabula kuketekela mwi Lesa! Nanchi Alona ne amiwa twimulupwile mema mu jino jibwe nyi?’ Mosesa wapumine mu jibwe bimye bibiji na kamama, kabiji ponkapo mema apomokele kufuma mu jibwe. Kwajinga mema avula bingi a kutoma bantu bonse ne banyama pamo.

Bino Yehoba wibazhingijile ba Mosesa ne Alona. Nanchi wayuka kyalengejile nyi? Ke na mambo a kuba’mba Mosesa ne Alona baambile’mba bo basakulupula mema kufuma mu jibwe. Bino Yehoba kine kine ye walupwile mema. Kabiji na mambo a kuba’mba Mosesa ne Alona babepele pa kino, Yehoba waambile’mba nkebakambula. Waambile’mba: ‘Kechi mukatwezha kino kipwilo mu Kenana ne.’

Palutwe kacheche bena Isalela bafumine mu Kadeshi. Pakupitapo kimye kicheche, bayile ku Mutumba wa Hola. Byo bafikile ku uno mutumba, Alona wafwijile peulu ya mutumba. Wafwile na myaka 123. Bena Isalela baubile bingi bulanda, onkao mambo pa moba 30, bantu bonse bamujijile Alona. Mwananji aye Eleaza ye waikele ke ñanga mukatampe wa mu mukoka wa bena Isalela.