Mose Mwaveta kuLilolwa
Chihande 40
Mose Mwaveta kuLilolwa
MYAKA chiyihita—myaka 10, myaka 20, myaka 30, jino himyaka 39! VaIsalele vachili lika mupambo. Hamyaka yoseneyi Yehova chalama lika vatu jenyi. Anakuvalisa lika mana. Musana mwavatambukisa nalivwi lyamuvule, ufuku nalivwi lyamilangi. Myaka yoseneyi uvwalo wavo kutanyuka chiku, namahinji avo kupwesuka chiku.
Jino hikakweji watete mumwaka wakusokesa 40 kufuma haze valovokele muEjipitu. VaIsalele vanatungu cheka muKateshe. Chikiko chihela vapwile halwola vatumine vandoji 12 kuya nakusondwesa Kanane kafwe myaka 40 kunyima. Yaya yaMose wapwevo, Milyame himwafwa kuKateshe. Nge muze chapwile nawa, vatu vali muukalu.
Vatu meya pimbi. Ngocho navamukokojwesa Mose ngwavo: ‘Kachi twafwile tuhu nayetu. Mwomwo ika watufumishilile muEjipitu nakutuneha kuchihela chachipi kwakuhona kwima kulya? Kakweshi kuma kwajimbuto, chipwe jikuyu, numba mihako yamivinyo najilomako. Kakweshi nameya akunwako.’
Mose naAlone hikuya kutavanaku nakulomba, kaha Yehova mwalweza Mose ngwenyi: ‘Kungululenu vatu vosena. Kaha hanjikenu kulilolwa kumeso avo. Mulilolwa namufuma meya amavulu akunwisa vatu navimuna javo.’
Mose hikukungulula vatu nakuvamba ngwenyi: ‘Ivwenu jino, enu mwahona kumufwelela Kalunga! Munasake ami naAlone tumilowele meya kulilolwa lino nyi?’ Mose mwaveta lilolwa namukombo wenyi kavali, kaha kulilolwa nakulovoka meya amavulu. Meya hinawapwa amavulu akunwa vatu navimuna.
Oloze Yehova napihilila naMose naAlone. Unejiva chinalingisa tahi? Mwomwo Mose naAlone vambanga nge vakivo navalovola meya kulilolwa. Olozenyi Yehova ikiye alinganga ngocho. Mose naAlone hakuhanjika makuli, Yehova hikuvalweza ngwenyi mwavazangamisa. Himwavamba ngwenyi: ‘Kamweshi kukengisa vatu jami muKananeko.’
Jino vaIsalele navafuma muKateshe. Kaha kapyapya kakandende hiwasha kuPili Hole. Alone hikufwa kuze kwilu lyapili. Afwile namyaka 123. VaIsalele navalinyenga kaha vatu vosena hikumulila Alone makumbi 30. Mwanenyi Eleyaza himwapwa jino kapilishitu wakulitulaho wamuchivali kumuyachi waIsalele.
Kulava 20:1-13, 22-29; Lushimbi lwamuchivali 29:5.