Mosi Neti Mwilola
MPANJI 40
Mosi Neti Mwilola
YAAKA nayaaka chiyihita—yaaka 10, yaaka 20, yaaka 30, yaaka 39! A Isarela achidi mwisaña. Ilaña hayaaka yejimiyi Yehova wadiña nakuyihemba antu jindi. Wayidyishaña manina. Wayilombolaña nachishimi chevu namwaana, nawufuku wayilombolaña nachishimi chakesi. Haniyi yaaka yejima yikovwelu yawu hiyatabukañaku ninyendu yawu hiyananañaku.
Hikakweji katachi kamuchaka cha 40 kufuma hampinji yafuminiwu muEjipitu. A Isarela hiyakutuña cheñi chilombu kuKadeshi. Aha dihu hadiñawu henohu akwakwendesha 12 anayitumi nakwendesha ituña daKenani mukamwihi nayaaka 40 yinahitihu. Muhela Mosi Miriyami hakufwila kuKadeshi. Neyi dikalu, henaha hadi kukala.
Antu hiyanawani menjiku. Dichi hiyakumutobela Mosi nawu: ‘Chadi kuwaha neyi twafwili. Muloñadi chiwatufumishili muEjipitu nakutuleta munidi iluña datama dakwila kwosi nimbutu yikumena? Mwosi kudya kwansaachi, mwosi nkuyu, mwosi vinyu, mwosi nimabula. Mwosi nimenji akunwa.’
Chelili aMosi naAroni ayi kutabanaka nakulomba, Yehova hakumuleja Mosi nindi: ‘Pompeshaku antu. Dichi kumesu awejima wawu wuhoshi kudina ilola didi kuna. Mukwidika menji amavulu akunwa antu niyimuna yejima.’
Dichi Mosi hakupompesha antu nakuyileja nindi: ‘Tiyenu enu mwabula kukuhwelela mudi Nzambi! Aroni ninami tuyiidishili menji mwilolidi?’ Mosi hakweta mwilola mapampa kayedi nambwechi, dichi menji amavulu hiyakwidika mwilola. Hadi menji amavulu akunwa antu niyimuna yejima.
Ilaña Yehova hakuhilila aMosi naAroni. Wuneluki muloña waweni? Muloña wudi wakwila nawu aMosi naAroni ahosheli nawu akwidisha menji mwilola. Ilaña Yehova diyi wayidishili. Yehova hakuhosha nindi wukuyibabesha aMosi naAroni muloña hiyahosheli walalaku. Hakuhosha nindi, ‘Himukalombola antu jami muKenaniku.’
A Isarela afumini kuKadeshi chakubula kunata mpinji. Halehili chantesha hohu ashika nikuMpidi yaHori. Aroni hakufwila henaha hewulu dampidi. Wudi nayaaka 123 yakusemuka hampinji yakufwa kwindi. A Isarela hiyakuneña nankashi nawa antu ejima hiyakumudila Aroni hadi mafuku 30. Mwanindi Eleyazari hakwikala kapristu muneni mumuza waIsarela.
Kuchinda 20:1-13, 22-29; Kuhituluka 29:5.
