Sturka 40

Moses Walpa Ra Prukan

PYUA lui kan; 10 mani, 20 mani, 30 mani, bara 39 mani nani lui wan! Bara Israel uplika nani ba kau upla iwras tasbaia ra kan. Ban sakuna naha manka nani sut bilara, Jehova ai uplika nani ra main kaiki kan. Manna wal dakaki kan. Kakna ra kasbrika playka kum wal ta bri kan, bara tihmia ra pauta klauhwan playka kum wal. Bara ai kwalka nani ba almuk taki kalwras kan bara ai mina nani sin plinhwras kan.

Witin nani Idsipt kuntrika wina taki bangwan ningkara, mani 40 ba bara kati pas ba alkan kan. Israel uplika nani ba kli Kedis ra kan. Witin nani biki kakaira 12 Kenan tasbaia ra blikan pyua ra, Kedis ra bangwi kan, baha wina pat 40 mani luan. Miriam, Moses lakrika ba Kedis ra pruan. Bara kainara baku, naha ra pât nani bara sa.

Upla nani ba li sip saki bangwras kan. Bara brukwi aisi Moses ra win: ‘Prui bangwri kata kau pain kaia kan. Dia muni Idsipt tasbaia wina wan saki naha tasbaia saura ra wan brih balram? Naha ra insla daukaia sip apia sa, kwah damni dusa nani apu sa, wain nasla apu sa, dus ma sat wala sin apu sa. Baha purkara li diaia kat sin apu sa.’

Moses Eran wal Gâd tentka ra ai pura sunaia wan taim, Jehova mita Moses ra win: ‘Man upla nani ba asla dauks. Witin nani sut mawanra baha walpa ba ra aisas, bara baha wina li ailal takbia, upla bara daiwan nani sut dukyara.’

Baku bamna Moses ba upla nani sut ra asla dauki win: ‘Gâd ra kasak lukras nani sma ba, wali bangws! Yang Eran wal naha walpaia wina li saki maiki bangwaia sna ki?’ Ningkara, Moses dus kum wal walpa ra aima wal prukan, bara li ailal takan. Li aitani bara kan upla bara daiwan nani sut baha ra kan ba dukyara.

Sakuna Jehova, Moses Eran aikuki wal ai kupia baikan. Dia muni sapa nu sma ki? Kan Moses Eran wal win, witin nani walpa ba wina li saki bangwai kan. Sakuna raitka ba lika Jehova laya ba sakan kan. Bara Moses Eran wal raitka aisaras kan ba mita, Jehova panis munaisa win. ‘Maikrika upliki nani na Kenan tasbaia ra dingkma apia,’ Jehova mita win.

Pyu wiria bilara Israel uplika nani ba Kedis wina taki wan. Bara pyu kunhku ra Hur ilka ra wih bangwan. Baha ilka bahna ra Eran pruan. Witin pruan taim 123 mani bri kan. Israel uplika nani ba uba sari taki, 30 dis baku Eran dukyara ini kan. Bara Eran luhpia, Iliasar ba Israel prîst wihtka aimakan.

Kulki kaikan 20:1-13, 22-29; Impakan sturka 29:5.