NI̱YA̱ʼA 39 ku̱i̱ya̱, ta na̱ ñuu Israel ndóokavana nu̱ú ñuʼú yi̱chí. Ndiʼi ku̱i̱ya̱ yóʼo Jehová xi̱ndaarana. Xi̱taxira maná xi̱xixina. Ta xi̱niʼira yichi̱ nu̱úna xíʼin vi̱kó nduʼú ña̱ xi̱ndichi nu̱ú ñuʼú iin saá nda̱a̱ nu̱ú ndiví, ta ñu̱ú xíʼin mií ñuʼu̱ túu̱n xi̱niʼira yichi̱ nu̱úna. Ni ti̱ko̱to̱na xíʼin ndu̱xa̱nna kǒo níkuyatáña.

Xa̱ku̱a̱ʼa̱n 40 ku̱i̱ya̱ ke̱ena ñuu Egipto. Na̱ ñuu Israel ndóo tukuna Qadés. Yóʼo xi̱ndoona tá ni̱xa̱ʼa̱n 12 ta̱a xi̱to se̱ʼéna ñuu Canaán, xa̱kúyatin 40 ku̱i̱ya̱ ku̱u ña̱yóʼo. Ña̱ Qadés yóʼo kúú nu̱ú ni̱xi̱ʼi̱ ñá Míriam ku̱ʼva ta̱ Moisés. Táki̱ʼva xi̱kaa tá ya̱chi̱ saá káatu vitinva íyoní ku̱a̱chi nu̱úna.

Ta nu̱ú ndóona yóʼo kǒo ti̱kui̱í. Ta ndáʼyi̱na nu̱ú ta̱ Moisés: ʼVa̱ʼaka níxi̱ʼi̱ndi̱ ñuu Egipto. ¿Ndachun ta̱váún ndi̱ʼi̱ kán ta ki̱xa̱a̱ndi̱ nu̱ú kǒo ña̱ʼa kána? Yóʼo kǒo ña̱ʼa kána kuxundi̱, ni ku̱i̱ʼi kǒo kána kaxíndi̱ ta ni ti̱kui̱í kǒo koʼondi̱ʼ.

Ta vitin ta̱ Moisés xíʼin ta̱ Aarón ku̱a̱ʼa̱nna tabernáculo ka̱ʼa̱nna xíʼin Jehová, ta nda̱kuiinra yu̱ʼu̱na ta̱ káchira: ʼSandátakandó ndiʼi na̱ ñuu Israel ná kixina kunina ka̱ʼún xíʼin yu̱u̱. Chí kandíka yu̱u̱ yóʼo kana ti̱kui̱í koʼona xíʼin kití sa̱na̱naʼ.

Ta̱ Moisés sa̱ndátakara ndiʼina ta ni̱ka̱ʼa̱nra xíʼinna: ʼKuniso̱ʼo ndóʼó na̱ kǒo kándíxa Jehová. Yi̱ʼi̱ xíʼin ta̱ Aarón tavándi̱ ti̱kui̱í kandíka yu̱u̱ yóʼo koʼondóʼ. Tasaá, ta̱ Moisés u̱vi̱ yichi̱ ka̱nira tú varara kandíka yu̱u̱ yóʼo, ta ku̱a̱ʼání ti̱kui̱í ki̱xaʼá kána kandíkaña.

Soo Jehová ni̱sa̱a̱ra xi̱nira ta̱ Moisés xíʼin ta̱ Aarón. ¿Á xíni̱ún ndachun ni̱sa̱a̱ra xíʼinna? Saáchi ta̱ Moisés xíʼin ta̱ Aarón ni̱ka̱ʼa̱nna ña̱ miína kúú na̱ ta̱vá ti̱kui̱í kandíka yu̱u̱ yóʼo. Soo su̱ví na̱yóʼo nítavárá chi Jehová kúú ta̱ ta̱várá. Xa̱ʼa ña̱ kǒo níka̱ʼa̱nna ña̱ nda̱a̱, yukú ta̱vára. Ña̱kán Jehová ni̱ka̱ʼa̱nra xíʼinna ña̱ taxira castigo ndaʼa̱na, ta káchira xíʼinna: ʼKǒo taxii̱ sandi̱ʼvindó na̱ ñui̱ ñuu Canaánʼ.

Xa̱ku̱numí kee na̱ ñuu Israel ña̱ Qadés. Tándi̱ʼi ni̱xa̱a̱na yuku̱ ña̱ naní Hor. Ta kán ni̱xi̱ʼi̱ ta̱ Aarón tá ndíka̱a̱ra 123 ku̱i̱ya̱ra. Na̱ ñuu Israel ni̱kusuchíní-inina xa̱ʼara, ta iin yo̱o̱ xa̱kuna. Ta̱ Eleazar se̱ʼera ndu̱u su̱tu̱ káʼnu ña̱ ñuu Israel.