MUA hitile miaka 39! Kaha vaIsaleli kasi tele va cili na ku heliangela mu zindinda. Mu miaka yose eyi Yehova ua kele na ku niunga mua cili vantu veni. Ua kele na ku va suka na manna. Ku mutana ua kele ku va tuamenena na liselua kaha ku vutsiki na mulengi ua tuhia. Mu miaka yose ize vuzalo vuavo ka vua tavuokele ci pue mikono yavo ka ya puesuokele.

Mu ngonde ya mbangelo ya muaka ua makumi auana fume ha va tuhukilile mu Ingito. Vunoni vaIsaleli va tulile naua lua mu civali mu Kandese. Eci cikeco cize cihela ci va tulile amba va tume vandondzi 12 kuya mu ku nenga cifuti ca Kanana miaka 40 ku nima. Ndumbu ya Mosesa Miliame ua tsilile ku Kandese. Vunoni ku na soloka naua vukalu vukuavo.

Vantu va tondele mema. Kaha va putukile ku linienga na Mosesa nguavo: ‘Ci li ku lutue nga tua tsile. Vika mua tu fumisila mu Ingito na ku tu neha muno mu zindinda ka mue ku soka mbuto? Cipue vinkuyu, cipue miti ya viniu, cipue vilomasi, na mema aku nua ahimo.’

Kaha omo Mosesa na Alone va ile ku mbalaka mu ku vundila, Yehova ua tumine Mosesa ngueni: ‘Kungulula vantu vose hamo. Handekela livue ku meso avo linga lituhuise mema. Mu ka tuhuka mema a engi linga vantu vanue na vimuna viavo.’

Kaha Mosesa ua kunguluile vantu na ku va leka ngueni: ‘Halakanenu enu ka mua tsilielele Njambi! Vuno ange na Alone tu hasa ku mi tuhuisila mema omu livue, ni?’ Kaha Mosesa ua vetele ku livue luvali, ngeci mua popolokele mema. Kaha kua kele mema a engi linga vantu na vimuna va nue.

Mosesa na Alone va nienguesele Yehova. Ua  tantekeya omo lia vika? Muomu Mosesa na Alone va handekele nguavo vakevo va lingisile mema ku tuhuka mu livue. Nkuma Yehova ikeye ua a tuhuisile. Kaha omo Mosesa na Alone ka va handekele vusunga, Yehova ua va leka ngueni aka va hana kasitiku. Ua va lekele ngueni: ‘Ka mu ka tuala vantu vange mu Kanana.’

VaIsaleli va katukile mu Kandese. Munima ya ntunda ya indende va ka hetele ku Muncinda ua Hole. Kaha Alone ua tsililile kuilu lia muncinda uze. Tele na puisa miaka 123. VaIsaleli va kele na vusiua vua kama ngeci va lilile kutsa ca Alone matangua 30. Kaha muaneni Eleazale ua mu sintsile mu ku pua sasendote ua cifuti ca Isaleli.