TLAPOUALISTLI 40

Moisés okiuitek tepexitl

OPANOK xiuitl... ¡10 xiuitl, 20 xiuitl, 30 xiuitl, 39 xiuitl! Uan israelitas ok okatkaj kanin tlauaki. Maski ijkon, itech nochtin ninmej xiuitl Jehová okimalui ialtepetl. Okintlakualti ika maná. Itech tonal okinyekanaya ika se mixtli, uan itech yoak ika se tlitl. Uan amo otlajtlanki intlaken nion okinkoko inmikxiuan.

Axkan okatkaj itech metstli se, itech xiuitl 40, satepan okiskej itech Egipto. Israelitas oksepa okatkaj itech Qadés. Nikan okatkaj ijkuak okintitlankej 12 tlakamej akinmej ichtaka otlachiatoj itech tlali Canaán tlen yokipiaya 40 xiuitl okintitlankej. Míriam ikni Moisés omikik itech Qadés. Uan ken achto, nikan noijki omochi ouijkayotl.

Tlaltikpaktlakamej amo okajsiayaj atl. Ik non, okiluijkej Moisés: ‘Okachi kuali tla timikiskiaj. ¿Tleka otitechkixti itech Egipto uan otitechualikak nikan kanin tlauaki uan kanin amo itlaj tlamochiua? Nikan amo onka trigo, nion higos, nion uvas, nion granadas. Nion onka atl pampa tikoniskej’.

Ijkuak Moisés uan Aarón oyajkej itech tabernáculo pampa motlatlaujtiskiaj, Jehová okilui Moisés: ‘Xiknechiko altepetl. Ijkuakon, inmixpan nochtin xiktlapoui tepexitl tlen ompa kajki. Uan itech tepexitl kisas miak atl pampa atliskej israelitas uan inyolkauan’.

Ijkuakon, Moisés okinnechiko israelitas, uan okinmilui: ‘¡Xitlakakikan, namejuan akinmej amo nanmotenmachiaj itech toTajtsin Dios! ¿Moneki Aarón uan ne timechkixtiliskej atl itech nin tepexitl?’. Ijkuakon, Moisés ojpa okiuitek tepexitl ika se kuauitl, uan oualkiski miak atl. Okatka miak atl pampa uelis atliskiaj nochtin israelitas uan inyolkauan tlen ompa okatkaj.

Maski ijkon, Jehová okualanki miak iuan Moisés uan Aarón. ¿Tikmati tleka? Pampa Moisés uan Aarón okijtojkej yejuan kichiuaskiaj ma kisa atl itech tepexitl. Maski ijkon, ye Jehová akin okichi ma kisa atl. Uan pampa Moisés uan Aarón amo okijtojkej tlen melauak itech nin, Jehová okijto kintlajyouiltiskia. Jehová okinmilui: ‘Namejuan amo nankalakiskej noaltepetl itech Canaán’.

San niman, israelitas okiskej itech Qadés. Satepan oajsikej kanin kajki tepetl Hor. Ompa ipan tepetl, omikik Aarón. Okipiaya 123 xiuitl ijkuak omikik. Israelitas omoyolkokojkej miak, uan ipan 30 tonalmej okichokilijkej Aarón. Axkan, Eleazar ikone Aarón okitlalijkej ken ueyi teopixki ipan altepetl Israel.

Números 20:1-13, 22-29; Deuteronomio 29:5.