Ekitebyo 40

Musa Okuteera Orukiri

EMYAKA egyenda neehinguraho—emyaka 10, emyaka 20, emyaka 30, emyaka 39! Kandi Abaisraeli bakiri omu ihamba. Kwonka omu myaka egi yoona Yehova naareeberera abantu be. Naabariisa emaanu. Nabeebembera n’empagi y’ekicu nyomushana, kandi nyekiro n’empagi y’omuriro. Kandi boona omu myaka egi ebijwaro byabo tibirakuzire kandi n’ebigyere byabo tibirazimbire.

Hati n’okwezi kw’okubanza okw’omwaka gwa 40 okwiha obu baaruga Misri. Abaisraeli kandi bagaruka baasiisira ahari Kadeshi. Aha niho baabaire bari obu entatsi 12 zaayoherezibwa kutata ensi ya Kanaani haihi emyaka 40 enyima. Munyaanya wa Musa Miriamu afeera ahari Kadeshi. Kandi nk’obwakare, hashuba habaho oburemeezi.

Abantu tibarikureeba amaizi goona. N’ahabw’ekyo beetomboitera Musa bati: ‘Nangwa haakiri kuri twafiire. Ahabw’enki waatwihire omuri Misri kutureeta omuri ogu mwanya mubi ogutarikweramu kintu kyona? Tiharimu ngano, tiharimu mitiini, tiharimu mizaabibu, tiharimu n’amakomamahanga. Tiharimu n’amaizi goona ag’okunywa.’

N’ahabw’ekyo Musa na Arooni ku baza omu ihema kushaba, Yehova agambira Musa ati: ‘Teeranira hamwe abantu. Reero omu maisho gaabo boona, gambira orukiri orwo oruri hangahari. Amaizi agarikumara abantu n’amatungo nigaija kururugamu.’

Atyo Musa ateeranira hamwe abantu, kandi abagira ati: ‘Muhurire, imwe abatarikwesiga Ruhanga! Nyowe na Arooni titurikubaasa kubaihira omuri oru rukiri amaizi?’ Bwanyima Musa ateera aha rukiri n’enkoni ye kabiri, amaizi maingi gaahimintika nigaruga omu rukiri. Habaho amaizi maingi g’abantu boona n’amatungo gaabo kunywa.

Kwonka Yehova agirira Musa na Arooni ekiniga. Noomanya ahabw’enki? N’ahabw’okuba Musa na Arooni bakagira ngu bo bakaba nibaza kureeta amaizi kuruga omu rukiri. Kandi obwo buzimazima ari Ruhanga owaakozire ekyo. Kandi ahabw’okugira ngu Musa na Arooni tibaragambire mazima agarikukwata ahari eki, Yehova agira ngu akaba naaza kubafubira. ‘Timurihitsya bantu bangye omuri Kanaani,’ atyo aba nikwo yaabagira.

Omu bwire bukye Abaisraeli baruga Kadeshi. Bwanyima y’akaanya kakye, bahika aha Rushozi Hoori. Hanu ahaiguru aha rushozi, Arooni afeeraho. Afa aine emyaka 123 y’obukuru. Abaisraeli bashaasha munonga, kandi abantu boona bamara ebiro 30 nibacurira Arooni. Omutabani Eleazaari aba niwe yaaba omunyamurwa mukuru w’eihanga rya Israeli.

Okubara 20:1-13, 22-29; Eky’Ebiragiro 29:5.