KUA pou te au mataiti—e 10 mataiti, 20 mataiti, 30 mataiti, e te 39 mataiti! E tei roto rai te ngati Iseraela i te metepara. I teia au mataiti pouroa kua akono a Iehova i tona iti tangata. Kua angai aia ia ratou ki te mana. Kua arataki aia ia ratou i te ao na te tuku anga i te tiao rangi na mua ia ratou, e te ai i te po. E kare roa to ratou kakau i kino ana i teia au mataiti pouroa, e kare to ratou vaevae i mamae ana.

Ko te marama mua teia o te 40 mataiti mei to ratou akaruke anga ia Aiphiti. Kua puakapa akaou to Iseraela ki Kadesa. Ko te ngai teia i tonoia ai te au tangata tutaka e 12 kia tutaka i te enua o Kanaana, vaitata rai e 40 mataiti i mua atu. Kua mate a Miriama te tuaine o Mose ki Kadesa. E mei to mua ana, kua tupu te manamanata.

Kare o te tangata vai. No reira ratou i kopekope ei kia Mose e: ‘E ngari ake matou i te mate.’ Eaa koe i arataki mai ei ia matou mei Aiphiti ki teia ngai kino pakari, kare e apinga e tupu? Kare e titona, kare e suke, kare e vine, kare e remuna. Kare katoa e vai ei inu.’

I te aere anga a Mose raua ko Aarona ki ko i te tapenakara i te pure, akakite a Iehova kia Mose e: ‘Akaputuputu mai koe i te iti tangata. E oti, i mua ia ratou katoatoa e tuatua koe ki tera toka i ko. Ka tae mai te vai no roto i te toka, e ka rava ei inu no te iti tangata e ta ratou au manu pouroa.’

I reira kua akaputuputu mai a Mose i te iti tangata e kua karanga e: ‘Akarongo mai ana kotou e te aronga kare e irinaki ana i te Atua! Ka rauka ainei ia maua ko Aarona te vai no kotou i roto i teia toka?’ Kua rutu i reira a Mose i te toka e rua taime ki te rakau, e kua maringi pu ua mai te vai mei roto i te toka. Kua rava te vai ei inu no te iti tangata pouroa e te manu.

Inara kua riri a Iehova ia Mose raua ko Aarona. Kua kite koe i te tumu? No te mea kua karanga a Mose raua ko Aarona e na raua i oronga mai i te vai no roto i te toka. Ko te tika tikai ra na Iehova. E no tei kore a Mose raua ko Aarona i akakite i te tika no runga i teia, kua tuatua a Iehova e ka akautunga aia ia raua. ‘Kare koe e arataki i toku iti tangata ki roto ia Kanaana,’ i karanga ai aia.

Kare i roa ana kua akaruke to Iseraela ia Kadesa. Muri poto ua mai kua tae ratou ki te Maunga ko Hora. I konei, i runga i te take o te maunga, kua mate a Aarona. E 123 ona mataiti i mate ei. Kua taitaia tikai to Iseraela, e kua pou e 30 ra to ratou aue anga ia Aarona. Kua riro mai tana tamaiti ko Eleazara ei taunga maata no te iti tangata o Iseraela.