DEN yari e pasa — 10 yari, 20 yari, 30 yari, 39 yari! Èn den Israelsma de ete na ini a sabana. Ma na ini ala den yari disi Yehovah e sorgu gi en pipel. A e gi den mana fu nyan. A e tyari den na deiten nanga wan wolku di de leki wan postu èn na netiten nanga wan faya di de leki wan postu tu. Èn na ini ala den yari disi den krosi no e broko èn den futu no e hati den.

A de a fosi mun now fu a di fu 40 yari fu sensi den ben gowe libi Egepte. Den Israelsma e opo den tenti baka na Kades. Na dya den ben de sowan 40 yari na fesi, di den ben seni den 12 spion go luku a kondre Kanan na wan kibri fasi. Moses sisa Miryam e dede na Kades. Èn neleki fa a ben de dya na fesi, na so problema de dya baka.

A pipel no man feni watra. Fu dati ede den e kragi na Moses: ’A ben o moro betre efu wi ben dede. Fu san ede yu ben tyari wi komoto na Egepte kon na a takru presi disi pe noti e gro? Nowan tarwe, nowan figa, nowan droifi èn nowan granaki-apra no de. Watra srefi no de fu dringi.’

Te Moses nanga Aron e go na a tabernakel fu begi, dan Yehovah e taigi Moses: ’Kari a pipel kon makandra. Dan na fesi den alamala, yu musu taki nanga a stonbergi di de yanaso. Nofo watra sa komoto na a stonbergi kon gi a pipel nanga ala den meti fu den.’

Fu dati ede Moses e kari a pipel kon makandra. A e taki: ’Un arki, unu di no abi frutrow na Gado! Na Aron nanga mi musu meki watra komoto na a stonbergi disi kon gi unu?’ Dan Moses e naki a stonbergi tu tron nanga en tiki èn bun furu watra e komoto fadon na a stonbergi. Nofo watra de gi a heri pipel nanga den meti fu dringi.

Ma Yehovah ati e bron nanga Moses nanga Aron. Yu sabi fu san ede? Bika Moses nanga Aron ben taki, dati na den ben o meki watra komoto na a stonbergi. Ma fu taki en leti, na Yehovah ben du dati. Èn fu di Moses nanga Aron no ben taki san de tru ini a tori disi, meki Yehovah e taki dati a o strafu den. ’Unu no sa tyari mi pipel go na Kanan’, a e taki.

No langa na baka, den Israelsma e hari komoto na Kades. Baka wan syatu pisi ten den e kon na a Hor-bergi. Dyaso, na tapu na ede fu a bergi, Aron e dede. A ben abi 123 yari di a dede. Den Israelsma e sari srefisrefi èn fu dati ede a heri pipel e krei 30 dei langa fu Aron ede. En manpikin Eliasar e tron a tra granpriester fu a pipel fu Israel.