TINAN ba tinan liu daudauk—tinan 10, 20, 30, 39! Ema Izraél sei hela iha rai-fuik maran. Maibé, durante tinan sira-neʼe Jeová tau matan ba ninia povu. Nia fó sira maná atu han. Iha loron nia lori sira ho kalohan koluna, no iha kalan ho ahi koluna. No durante tinan hotu neʼe, sira-nia roupa la sai aat no ain la sai moras.

Agora fulan primeiru husi tinan 40 depois sira sai husi Ejitu. Ema Izraél hela iha Kades dala ida tan. Besik tinan 40 liubá, espiaun naʼin-12 bá atu hafuhu rai Kanaan husi fatin neʼe. Moisés nia biin Miriam mate iha Kades. No hanesan ho tempu uluk, problema mosu iha neʼe.

Povu la bele hetan bee. Nuneʼe, sira kesar ba Moisés: ‘Diʼak liu ita mate tiha. Tanbasá Ita lori ami sai husi Ejitu toʼo fatin aat neʼebé la iha buat ida bele moris? Iha neʼe la iha trigu, uvas, romaun ka ai-fuan seluk. Toʼo bee atu hemu mós la iha.’

Kuandu Moisés no Aarão bá tabernákulu atu halo orasaun, Jeová hatete ba Moisés: ‘Halibur povu. Depois, iha sira hotu nia oin koʼalia ba fatuk-lolon neʼebá. Bee sei sai husi fatuk neʼe ba ema no sira-nia animál hotu.’

Nuneʼe, Moisés halibur povu, no hatete: ‘Rona mai, imi neʼebé la konfia ba Maromak! Aarão no haʼu tenke hasai bee husi fatuk neʼe ba imi ka lae?’ Depois, Moisés uza ai-tonka atu baku fatuk-lolon neʼe dala rua, no bee barak suli. Ikusmai, iha bee ba povu no sira-nia animál hotu atu hemu.

Maibé, Jeová hirus ba Moisés no Aarão. Hatene tanbasá? Tanba Moisés no Aarão hatete katak sira mak halo bee sai husi fatuk-lolon. Maibé, tuir loloos, Jeová mak halo. No tanba Moisés no Aarão la koʼalia lia-loos kona-ba ida-neʼe, Jeová hatete katak nia sei fó kastigu ba sira. Nia hatete: ‘Imi sei la lori haʼu-nia povu tama Kanaan.’

Lakleur ema Izraél sai husi Kades, no laʼo toʼo Foho Hor. Iha foho leten neʼe Aarão mate. Nia tinan 123 bainhira nia mate. Ema Izraél triste loos, no durante loron 30 sira tanis. Aarão nia oan Eleazar sai amlulik boot tuirmai ba nasaun Izraél.