INYOM kar tsô shi igen i kar—anyom 10, anyom 20, anyom 30, anyom 39! Kpa Mbaiserael mba ken taaikyôngo her tsô. Nahan cii kpaa ken anyom ne cii Yehova ngu nengen sha ior nav dedoo. Ngu koson ve sha mana. Ka a hemen ve atetan sha ibeenegh ki cirin, man tugh di yô i lu sha ibeenegh ki usugh. Man shi ken anyom ne cii akondo a ve bee iyol ga shi angahar a ve kpaa mura ga.

Hegen ka uwer u hiihii ken inyom i sha 40 hii shighe u yange ve due ken Igipiti kera je la. Mbaiserael shi haa afo hen Kadeshi. Ka pe yange ve lu shighe u i tindi mbamkerev mba 12 mbara er ve̱ za nenge mker ken tar u Kanaan anyom ken jime 40 je ne. Miriam anngô u Mose u kwase la kpe hen Kadeshi. Man shi er ka i vande lun kera nahan, mzeiyol ngu heen.

Ior fatyô u zuan a mngerem ga. Nahan ve gba vaan a Mose kaan er: ‘Guda u yange ma se kpe. Ka nyi je ne dugh a vese ken Igipiti ne ve a vese hen bojiir u kwaghmôm kpaa una fatyô u menden heregh ga nee? Ishamakaa ngi ga, tur ngu ga, ikon i wain ngi ga, shin pomegraneti kpaa ga. Mngerem ma man tsô kpaa ma ga.’

Mose kua Aron mba ze hen tabernakel sha u vea za er msen yô, Yehova kaa a Mose er: ‘Kohol ior cii ijiir i môm. Tsô sha ishigh vegh cii ôr kwagh a vande u u lu heela la. Mngerem maa due ken ú sha ci u ior cii man uzendeinya kpaa.’

Nahan Mose kohol ior, man a kaa er: ‘Kegh nen ase ato, ne mba hemban Aôndo ato mban! Aron kua mo sé due a mngerem ken vande ne sé na ne zee?’ Tsô Mose man gbidye aga sha vande la kwa har, man mngerem due kpishi ken vande la. Mngerem ngee kuma u hanmaor kua uzendeinya cii vea ma yô.

Kpa ishima vihi Yehova a Mose man Aron. Ú fa ityôkyaa kpa? Ka sha ci u Mose man Aron yange ve kaa er ka ve vea va a mngerem ken vande la ye. Kpa sha mimi yô lu Yehova va a mi ye. Man sha ci u Mose man Aron yange ve ôr mimi sha kwagh ne ga yô, Yehova kaa er una tsaha ve. ‘Ne hemen ior av ne nyôr a ve ken Kanaan ga cii,’ a kaa nahan.

Ica kera gba ga tsô Mbaiserael ve mough hen Kadeshi kera. Shighe kpeghee yô ve va a̱r hen Uwo u Hor. Heen ne, sha ityough ki uwoogh kila, Aron man kpe. Lu anyom 123 sha shighe u ku na la. Mbaiserael zungwe ku na kpishi, nahan ior cica cii vaa ku u Aron ayange 30. Wan na Eleasar hingir pristi u tamen u nongo u Iserael.