PLANTI yia i lus​—⁠10-pela yia, 20 yia, 30 yia, 39 yia! Na ol Israel i stap yet long ples drai nating. Tasol long olgeta dispela yia Jehova i lukautim lain bilong em. Em i givim mana long ol olsem kaikai. Long san em i putim wanpela bikpela smok bilong soim rot long ol, na long nait em i putim paia. Na long olgeta dispela yia, klos bilong ol i no bagarap, na lek bilong ol i no pen.

Nau em i namba 40 yia bihain long taim ol i lusim Isip, na em namba wan mun bilong dispela yia. Ol Israel i wokim kem gen long Kades. Ol i bin stap long dispela hap taim Moses i salim 12-pela man i go lukstil long Kenan, klostu 40 yia bipo. Miriam, em susa bilong Moses, em i dai long Kades. Na hevi i kamap olsem bipo.

Ol manmeri i no inap painim wara. Olsem na ol i toktok planti long Moses, olsem: ‘I gutpela moa sapos mipela i dai pinis. Bilong wanem yu kisim mipela long Isip na bringim mipela i kam long dispela ples nogut em kaikai i no inap kamap long en? I no gat wit, na fik, na grep samting. Na no gat wara tu.’

Taim Moses na Aron i go insait long haus lotu sel bilong beten, Jehova i tokim Moses: ‘Bungim ol manmeri. Na long ai bilong olgeta, toktok long dispela bikpela ston i stap long hap. Wara bai kamap long en, na em bai inap tru long ol manmeri wantaim olgeta animal bilong ol.’

Olsem na Moses i bungim ol manmeri, na em i tok: ‘Harim, yupela ol man i no bilip long God! Ating mitupela Aron i mas mekim wara i kamap long dispela ston na bai yupela i dring, a?’ Na Moses i paitim dispela ston tupela taim long stik, na bikpela wara i kapsait i kamaut long ston. Wara em inap long olgeta manmeri na animal bilong ol.

Tasol Jehova i kros long Moses na Aron. Yu save bilong wanem em i kros long tupela? Em i kros, long wanem, Moses na Aron i tok tupela bai mekim wara i kamap long dispela ston. Tasol tru tru em Jehova yet i mekim wara i kamap. Moses na Aron i no mekim tok tru long dispela samting, olsem na Jehova i tok em bai givim strafe long tupela. Em i tok: ‘Yupela i no inap bringim lain bilong mi i go insait long Kenan.’

I no longtaim na ol Israel i lusim Kades. Bihain liklik ol i kamap long maunten Hor. Hia, antap long maunten, Aron i dai. Em i gat 123 krismas long taim em i dai. Ol Israel i bel hevi tru, na inap 30 de ol i krai long Aron. Eleasar, em pikinini man bilong Aron, em i kamap hetpris bilong lain Israel.