10 чыл, 20 чыл, 30 чыл, 39 чыл эртип тур! А изра́ильчилер ол-ла хевээр куруг ховуда азып чоруп турар. Ынчалза-даа ол чылдар дургузунда Иегова бодунуң чону дээш сагыш човап турар. Ол оларны ма́нна-биле чемгерип турар. Хүндүс Бурган оларны булуттуг багана дузазы-биле, а дүне — оттуг багана дузазы-биле оруун айтып берип турган. Шупту ол чылдар дургузунда оларның хептери элевээн, а идиктери буттарын өйбес болган.

Еги́петтен үнгенден бээр 40 чылдың бир дугаар айы эгелээн. Изра́ильчилер катап Кадеске майгыннарын тип алган. Ол таптыг-ла 40 чыл бурунгаар 12 хайгыылчының Ханаа́н черинче чоруткан чери-дир. Кадеске Моисе́йниң угбазы Мариа́мь мөчээн. Ам база маңаа хай болу берген.

Чон суг тыппайн барган. Олар Моисе́йге хомудал киирген: ‘Ооң орнунга өлүп калган болзувусса. Чүге сен бисти Еги́петтен үндүрүп алгаш, чүү-даа үнмес, шак бо коргунчуг черже бисти эккелдиң? Мында тараа-даа, инжир-даа, виноград-даа, гранат-даа чок. Ижер суг безин чок-тур’.

Моисе́й биле Ааро́н мөргүүр дээш, чадырга кээрге, Иегова Моисе́йге харыылаан: ‘Бүгү чонну чыывыт. Олар шуптузу көрүп турда, ол хаяга сугну үндүрер кылдыр чугаала. Ынчан шупту кижилерге болгаш дириг амытаннарга четчи бээр суг оон тура агып кээр’.

Моисе́й чонну чыып алгаш чугаалаан: ‘Силер, Бурганга бүзүревес кижилер, бээр дыңнаңарам! Кай, силерге бо хаядан сугну мен биле Ааро́н үндүрүп бээр улус бис бе?’ Ооң соонда ол хаяны даянгыыш-биле ийи катап соптарга, оон тура шапкын суг аттыгып келген. Суг шупту кижилерге болгаш дириг амытаннарга четчир болган.

Ынчалза-даа Иегова Моисе́й биле Ааро́нче килеңнеп турар. Чүге деп, билир сен бе? Чүге дээрге Моисе́й биле Ааро́н хаядан сугну олар үндүрүптер деп чарлааннар. А херек кырында ону Иегова кылыпкан болгай. Моисе́й биле Ааро́н шынны чугаалавааны дээш, Иегова оларны шиидер деп чарлаан. ‘Мээң чонумну Ханаа́нче киирбес силер’,— деп, ол чугаалаан.

Удаваанда изра́ильчилер Кадестен чорупканнар. Оон Ор деп дагга чедип келгеннер. Маңаа, дагның бажынга, Ааро́н чок апарган. Ол 123 харлыг турган. Изра́ильчилер хөлчок муңгарап турган: 30 хүн дургузунда Ааро́н дээш чон ажыын ажып, ыглап турган. Ооң соонда Изра́иль чоннуң дээди бараалгакчызы Ааро́ннуң оглу Елеаза́р апарган.