Ha fhira miṅwaha ya 10, miṅwaha ya 20, miṅwaha ya 30, miṅwaha ya 39! Vhaisiraele vha tshee sogani. Fhedzi miṅwaha iyi yoṱhe Yehova o vha a tshi londa vhathu vhawe. O vha a tshi vha fusha nga mana. Masiari a tshi vha tshimbidza nga gole, vhusiku nga mulilo. Nahone vhukati ha miṅwaha iyi yoṱhe zwiambaro zwavho zwo vha zwi sa ṱahali na milenzhe yavho i sa vhavhi.

Zwino wo vha u ṅwedzi wa u thoma wa ṅwaha wa vhu-40 u bva tshee vha ṱuwa Egipita. Vhaisiraele vha dovha vha akha dzidennde Kadese. Afha ndi he vha vha vhe hone zwiḽa hu tshi rumiwa dziḽa ṱholi dza 12 u ṱola shango ḽa Kanana hu ṱoḓaho u vha miṅwaha ya 40 nga phanḓa. Miriama khaladzi a Mushe a fela Kadese. Ha vha na khakhathi henefha u fana na u thomani.

Vhathu vho vha vha sa wani maḓi. Vha gungulela Mushe: ‘Zwo vha zwi tshi ḓo vha khwine arali ro fa. Wo ri bviselani Egipita wa ri ḓisa afha fhethu huvhi hu sa meli tshithu? A hu na mavhele, mahuyu, nḓirivhe na maramba. A hu na na maḓi a u nwa.’

Musi Mushe na Aroni vha tshi ya denndeni ya mulanga u rabela, Yehova a vhudza Mushe: ‘Kuvhanganya vhathu. Zwenezwo phanḓa havho vhoṱhe a ambe na tombo heḽiḽaa. Hu ḓo bva maḓi o eḓanaho khaḽo a vhathu na zwipuka zwavho zwoṱhe.’

Ngauralo Mushe a kuvhanganya vhathu, a ri: ‘Thetshelesani, vhoinwi ni sa fulufhedzi Mudzimu! Aroni na nṋe ri ni bvisele maḓi tomboni iḽi?’ Zwenezwo Mushe a rwa tombo luvhili nga lubaḓa, ha shuluwa maḓi manzhi a tshi bva tomboni. Ha vha na maḓi o eḓanaho a u nwiwa nga vhathu vhoṱhe na nga zwipuka.

Fhedzi Yehova a sinyutshela Mushe na Aroni. Ni a ḓivha uri ndi ngani? Ndi ngauri Mushe na Aroni vho vha vho ri vhone vho vha vha tshi ḓo bvisa maḓi tomboni. Fhedzi ndi Yehova o zwi itaho. Ngauri Mushe na Aroni vho vha vha songo amba ngoho nga ha izwi, Yehova a ri u ḓo vha ṱarafa. A ri: À ni nga ḓo dzhenisa vhathu vhanga Kanana.’

Nga u ṱavhanya Vhaisiraele vha ṱuwa Kadese. Nga murahunyana vha ḓa Thavhani ya Horo. Henefha, nṱha ha thavha, Aroni a fa. O vha e na miṅwaha ya 123 nga tshifhinga tsha lufu lwawe. Vhaisiraele vha ṱungufhala zwihulu, nahone vhathu vhoṱhe vha lilela Aroni maḓuvha a 30. Murwa wawe Eleasara a vha tshifhe muhulu a tevhelaho wa lushaka lwa Isiraele.

Numeri 20:1-13, 22-29; Doiteronomio 29:5.