YAKA yikumala, yaka 10, 20,30, mpaka yaka 39! Ayisalayeli ali mwipululupe. Nambo mu yaka yosopeyi, Yehofa akwasamalila ŵandu ŵakwe. Akwalisya mana. Musi akwalongola ni cipilala ca liwunde, cilo akwalongola ni cipilala ca moto. Mu yaka yosopeyi yakuwala yawo ngayikumala, soni sajo syawo ngasikupweteka.

Sambano uli mwesi wandanda wa caka ca 40 cityocele ku Eguputo. Ayisalayeli akutaŵasoni matenti pa Kadesi. Gelega gali malo gaŵatemi paŵatumile ŵakusonda 12 kwawula ku cilambo ca Kanani yaka ciŵandika 40 yipiteyo. Miliyamu mlumbugwe Musa akuwila ku Kadesiku. Sambano mpela muyaŵelele pandaŵi jamunyumajo, pakuŵasoni yakusawusya pamaloga.

Ŵandu ngakugapata mesi galigose. Sambano akumdandawulila Musa kuti: ‘Yikaŵele cenene tukagambe kuwa. Ana ligongo cici mwatukopwesye ku Eguputo nikutujigalila ku malo agano gakusawusyaga gangamela cilicose? Gangali tiligu, mikuju, mipeleya, soni yisogosi yiliyose. Atamose mesi gakumwa pangali.’

Sambano Musa ni Aloni pakwawula ku tenti jakulambilila kukupopela, Yehofa akumsalila Musa kuti: ‘Mwasonganganye ŵanduwo pampepe. Kaneko pameso pa wosopewo m’ŵecete kwa lwala alo. Cigakopoce mwelemo mesi gamajinji gakwanila kumwa ŵandu, soni yinyama yawo yosope.’

M’yoyo Musa akwasonganganya ŵandu, ni akuŵeceta kuti: ‘Mpikane, ŵandumwe ŵanganimkola cikulupi mwa Mlungu! Ana mkusaka kuti une ni Aloniju tumkopocesye mesi mulwalamu?’ Kaneko musa akuputa kaŵili lwala lula ni simbo jakwe, ni mesi gamajinji gakukopoka mulwala mula. Pana mesi gakumwa gakwanila ŵandu ni yinyama yosope.

Nambo Yehofa ŵamtumbilile Musa ni Aloni. Ana akumanyilila ligongo lyakwe? Lili ligongo lyakuti Musa ni Aloni ŵasasile kuti jemanjajo ni ŵaŵakopwesye mesi mulwala. Nambo yisyesyene yakwe ni yakuti Yehofa ni juŵakopwesye mesigo. Sambano pakuŵa Musa ni Aloni nganasala yisyesyene panganiji, Yehofa akwasalila kuti ciŵape cilango. Jwalakwe akuti: ‘Ngasimwalongola ŵandu ŵangu kwinjila m’cilambo ca Kanani.’

Kaneko mwacangakaŵa Ayisalayeli akutyoka ku Kadesi. Ali ajesile panandi akwika pa Litumbi lya Hola. Kweleku, Aloni akuwa ali penani palitumbi. Akuwa ali akwete yaka 123. Ayisalayeli akwete canasa mnope, ni akulila malilo ga Aloni kwa masiku 30. Eliyasala, mwanagwe Aloni akuŵa jwambopesi jwamkulungwa jwa mtundu wa Ayisalayeli.