MÁAN ¡diez, veinte, treinta yéetel treintai nueve jaʼaboʼob! Le israelitaʼoboʼ láayliʼ tiaʼanoʼob teʼ x-tokoy luʼumoʼ. Tu yáamil tuláakal le jaʼaboʼobaʼ, Jéeoba kanáantkoʼob. Ku tséentaʼaloʼob yéetel maná. Yéetel kʼiineʼ ku nuʼuktaʼaloʼob yéetel u tʼoʼol múuyal, tiʼ áakʼabeʼ yéetel u tʼoʼol kʼáakʼ. Ku tsʼoʼokleʼ maʼ laʼab u nookʼoʼobiʼ mix xan chuʼup u yookoʼobiʼ.

Lelaʼ yáax mes tiʼ le cuarenta jaʼaboʼob jóoʼkoʼob Egiptooʼ. Le israelitaʼoboʼ tiaʼanoʼob tu kaʼatéen Cadeseʼ. Óoliʼ cuarenta jaʼaboʼob yáax máankoʼob teʼelaʼ; tiʼ yanoʼob kaʼach ka túuxtaʼab le doce máakoʼob u jach iloʼob bix u luʼumil Canaaneʼ. Teʼelaʼ tiʼ xan kíim María, u kiik Moisesiʼ. Jeʼex kaʼacheʼ, láayliʼ tu máansoʼob talamiloʼobeʼeʼ.

Minaʼan jaʼ utiaʼal u yukʼ le máakoʼoboʼ. Le oʼolal táan u yaʼalikoʼob tiʼ Moisés: Maas maʼalob kaʼach ka kíimkoʼon. ¿Baʼaxten ta jóoʼsoʼon Egipto utiaʼal a taasoʼon kíimil teʼ x-tokoy luʼumaʼ? Wayeʼ minaʼan igoʼob, mix uvaʼob, mix granadaʼob mix uláakʼ baʼal utiaʼal jaantbil. Minaʼan mix jaʼ utiaʼal ukʼbil.

Ka bin Moisés yéetel Aarón payalchiʼ teʼ tabernáculooʼ, Jéeobaeʼ tiaʼalaj tiʼ Moisés: Muchʼ le kaajoʼ. Tu táan tuláakaleʼ aʼal ka jóokʼok jaʼ teʼ tuunich yaan teʼeloʼ. Teʼ tuunich túunoʼ yaan u jóokʼol yaʼabach jaʼ utiaʼal le kaajoʼ bey xan utiaʼal u yaalakʼoʼob.

Bey túunoʼ, Moisés yéetel Aaroneʼ tu muchʼkíintajoʼob le máakoʼoboʼ ka tiaʼaloʼobtiʼob: ¡Uʼuyeʼex j-maʼ uʼuyaj tʼaaneʼex! ¿Yaan wa k-jóoʼsik jaʼ teʼ tuunich utiaʼal k-tsʼáa a wukʼeʼexaʼ? Moisés túuneʼ tu jatsʼaj kaʼapuul le tuunich yéetel u xóolteoʼ, ka joʼopʼ u tuul yaʼabach jaʼiʼ. Ka túun yanji jaʼ utiaʼal tuláakal máak bey xan utiaʼal tuláakal baʼalcheʼob.

Baʼaleʼ, Jéeobaeʼ kʼuuxilnaj yéetel Moisés bey xan yéetel Aarón. ¿A wojel wa baʼaxten? Tumen Moisés yéetel Aaroneʼ tiaʼaloʼob letiʼob kun beetik u jóokʼol jaʼ teʼ tuunichoʼ. Baʼaleʼ, u jaajileʼ, Jéeoba beetej. Yéetel tumen xan maʼ tiaʼaloʼob u jaajil yoʼolal le baʼax úuchoʼ, ka aʼalaʼabtiʼob tumen Jéeoba: Maʼ ken a wokseʼex in kaajal tu luʼumil Canaán.

Ka tsʼoʼok leloʼ, le israelitaʼoboʼ lukʼoʼob Cades. Maʼ xáanchaj ka kʼuchoʼob tu witsil Horiʼ. Teʼeloʼ, tiʼ kíim Aaroniʼ, 123 jaʼaboʼob yantiʼ ka kíimi. Le israelitaʼoboʼ jach okʼom óolchajoʼob, máan treinta kʼiinoʼob táan u yoʼtikoʼob Aarón. Ka tsʼoʼokeʼ Eleazar, u paal Aarón, kʼuch u beetuba nojoch j-kʼiinil tu kaajil Israel.