?LIKE nga ɔ blabla waka’n wun lɛ’n ɔ ti wuo jrɛiin sakpa? Cɛcɛ. Nán wuo kpa ɔ, aaba wuo ɔ. Zoova yɛ ɔ seli Moizi kɛ ɔ yo fa sie i nglo naan i liɛ’n, sɛ nvlefuɛ’m be niɛn i lɔ’n, be su wuman. Sanngɛ wuo nga be o asiɛ wun’n, be liɛ be ti wuo jrɛiin. B’a kaka Izraɛlifuɛ kpanngban kpa, i ti b’a tɔ i wun tukpaciɛ. ?Sanngɛ amun si like ti’n?

Izraɛlifuɛ’m be kannin Ɲanmiɛn nin Moizi be wun ndɛ tɛtɛ ti ɔ. Be waan: ‘?Nzu ti yɛ amun ko fali e Ezipti lɔ kɛ e wa wu aawlɛ flɛnnɛn nga nun wa ɔ? Be ɲanman aliɛ wa, be ɲanman nzue wa. Yɛ mani’n w’a flan e.’

Sanngɛ kusu nán aliɛ tɛ yɛle mani’n. Zoova bɔbɔ yɛ ɔ yili atrɛ mannin be aliɛ sɔ’n niɔn. Nzue bɔbɔ nga be nɔn’n, atrɛ yɛ Zoova yili mannin be ɔ. Sanngɛ i ngba ngalɛ nun’n, nvlefuɛ’m b’a laman Zoova ase. W’a yoman be fɛ. I sɔ ti yɛ maan Zoova sunmannin wuo mɔ be le bɔyre tɛtɛ kpa’n kɛ be wa kaka be’n niɔn. Wuo’m be kakali Izraɛlifuɛ mun kpa, naan be nun sunman b’a wu.

I sin naan nvlefuɛ’m b’a ko to Moizi. Be wa seli i kɛ: ‘E fɔnnin, afin e kannin Ɲanmiɛn nin wɔ amun wun ndɛ tɛtɛ. Yaci, kpata Ɲanmiɛn man e naan ɔ fuan wuo nga mun.’

Ɔ maan Moizi srɛli nvlefuɛ’m be ti. Yɛ Zoova seli i kɛ ɔ yo aaba wuo nga ɔ. Ɔ seli i kɛ ɔ fa sie i waka kun su, naan sɛ wuo ka sran kun’n, ɔ nian aaba wuo sɔ’n. Moizi niannin ndɛ nga Zoova kannin’n su yoli. Kpɛkun sran kwlaa nga wuo kɛ i naan ɔ nian aaba wuo’n, ɔ yo juejue.

Ndɛ ngalɛ’n man e afɔtuɛ kun. Yɛle kɛ e ngba’n, e ti kɛ Izraɛlifuɛ nga wuo’m be kakali be’n sa. Wie’n wo e kwlaa e su. Sran kwlaa nga e nin be tran’n, be yo kpɛnngbɛn, be tɔ tukpaciɛ kpɛkun be wu. E nannan klikli Adam nin Ɛvu, be sin mɔ be kacili be sili Zoova’n, mɔ e kusu e ngba’n e ti be mma mun, i ti yɛ ɔ ti sɔ ɔ. Sanngɛ Zoova mannin e anannganman nguan’n i wun atin.

Zoova sunmannin i Wa Zezi Klist asiɛ’n su wa. Be kunnin i waka kun su, afin sran sunman be tɔnnin i suɛn kɛ ɔ ti sran tɛfuɛ. Sanngɛ Zoova fali Zezi mannin e kɛ ɔ de e ti. Sɛ e kpɛ e ɲin Zezi i wun lɔ’n, naan sɛ e fɛ i atin’n su’n, e kwla ɲan anannganman nguan. Sanngɛ kɛ é wá jú e ɲrun lɔ’n, é súan Zezi i su ndɛ kpanngban.