BUSHE iyi nsoka ipombelwe ku cimuti ilemoneka kwati ni nsoka ya cine? Te nsoka ya cine. Baipangile fye no mukuba. Yehova aebele Mose ukubika insoka pa cimuti pa kuti abantu baleimona no kuba no mweo. Lelo insoka ishali pa nshi shena shali sha cine. Shalisumine na bantu no kubalwalika. Bushe nawishiba icalengele?

Ni co abena Israele balilandile ifyabipa pali Lesa na Mose. Baleilishanya abati: ‘Mulandu nshi watufumishe mu Egupti no kutuleta mu kufwila muno mu matololo? Muno tamwaba ifya kulya na menshi kabili twatendwa ukulya mana.’

Lelo mana yali ca kulya icisuma. Yehova alebapeela mana mu cipesha amano. E lyo alibapeele na menshi mu cipesha amano. Lelo abantu tabaletasha pa fyo Lesa alebapeela. E ico Yehova alengele kwaba insoka ishalesuma abantu, na bengi abasuminwe balifwile.

Abantu abengi baile kuli Mose no kumweba ati: ‘Natubembuka pantu natulanda ifyabipa pali Yehova na iwe. E ico tupepeleko kuli Yehova pa kuti afumyepo ishi insoka.’

Ilyo Mose apepeeleko abantu, Yehova amwebele ukupanga insoka ya mukuba. Lesa amwebele ati, bika insoka pa cimuti pa kuti onse uo yasuma aloleshako. Mose alicitile ifyo Lesa amwebele. Abantu abo insoka yalesuma balelolesha ku nsoka ya mukuba no kupola.

Kuti twasambililako fimo kuli ici. Ifwe bonse twaba kwati bena Israele abalesumwa ne nsoka. Bonse twalipyana imfwa pa mulandu wa kuti Adamu na Efa balibembukile Yehova. Apo tuli bana babo tulakota, tulalwala no kufwa. Lelo Yehova alicitapo cimo icikalenga tukekale umuyayaya.

Alitumine Umwana wakwe Yesu Kristu ukwisa pano calo. Yesu balimupoopeele pa cimuti pantu abantu abengi balemona kwati ali muntu umubi. Lelo Yehova atupeele Yesu ukuti atupusushe. Nga twamucetekela no kukonka ifyo aletweba, tukakwata umweo wa muyayaya. Tukasambilila na fimbi pali ili ilyashi.