?HEMIA i wan trufala snek we i tantanem hem wan i goraon long pos ya? Nogat. Snek ya, oli wokem long bras. Jeova i talem long Moses blong wokem snek ya, putum long wan pos, mo stanemap pos ya. Nao ol man oli mas lukluk snek ya blong bambae oli no ded. Be ol narafala snek olbaot long graon ya, oli ol trufala snek. Oli kakae ol man finis mo naoia ol man oli sik. ?Yu save from wanem samting ya i hapen?

Hemia from we ol man Isrel oli toktok agensem God mo Moses. Oli komplen se: ‘?From wanem yu tekemaot mifala long Ijip blong mifala i kam ded long draeples ya? Ples ya i no gat wota long hem, mo i no gat kakae tu. Mo mifala i taedgud long rabis kakae ya, mana.’

Be mana ya i gudfala kakae. Jeova i bin mekem wan merikel blong givim kakae ya long olgeta. Mo hem i bin mekem wan merikel bakegen blong givim wota long olgeta. Be ol man ya oli no talem tangkiu long God from ol samting ya we hem i mekem blong lukaotgud long olgeta. Taswe Jeova i sanem ol posen snek ya blong panisim ol man Isrel. Ol snek ya oli kakae olgeta, mo plante oli ded from.

Nao ol man oli kam luk Moses, oli talem long hem se: ‘Moses. Mifala i mekem nogud ya we mifala i stap tok agens long Jeova mo agens long yu tu. Plis yu prea long Jeova blong i tekemaot ol snek ya oli gowe long mifala.’

Ale, Moses i prea. Nao Jeova i talem long Moses blong wokem snek ya long bras. Hem i talem long Moses blong putum snek ya long wan pos mo stanemap, nao sipos wan posen snek i kakae wan man, man ya i mas lukluk i go long snek ya we oli wokem long bras. Nao bambae hem i kamgud bakegen. Ale, Moses i mekem olsem we God i talem long hem.

Yumi lanem wan lesen from ol samting ya. Long wan fasin, yumi evriwan i olsem ol man Isrel ya we ol snek oli kakae olgeta ya. Yumi evriwan i stap go from ded nomo. Raonabaot long yumi, ol man oli stap kam olfala, oli sik, mo oli stap ded. Hemia from we faswan man mo woman, Adam mo Iv, tufala i lego Jeova. Mo yumi evriwan yumi pikinini blong tufala ya. Be Jeova i mekem wan rod blong yumi save gat laef we i no save finis.

Jeova i sanem Pikinini blong hem Jisas Kraes i kam long wol ya. Plante man oli ting se Jisas i wan man nogud, ale oli nilim hem long pos. Be Jeova i letem Jisas i ded blong sevem yumi. Sipos yumi lukluk i go long hem, mo folem hem, ale yumi save gat laef we i no save finis. Biaen, bambae yumi toktok moa long saed blong samting ya.

Namba 21:4-9; Jon 3:14, 15.