KANASOLOKA ngwe kapela wamwenemwene unasukama ku mutondo nyi ngwami? Ka, hi wamwenemwene ko. Kapela yono kali wakulinga ni unengu. Yehova yatuma Mose hanga amulimbe ku mutondo, hanga atu te ahase kumutala mba atwame ni mwono. Alioze tupela akwo ali hashi kali amwenemwene. Tupela jacho kanasuma atu ni kwayijisa. Yena unanyingika mumu liaka?

Mumu A-Izalele kanakahanjika ni kulimika ni Zambi ni kuli Mose. Ayo yaputuka kulinyenyeta ngwo: ‘Mumu liaka unakatuchiza mu Engitu hanga tufwile muno mu puya? Kuno kushi kulia chipwe meya akwihi. Tuchi kuhasa kulia nawa manaa mumu hatukenya.’

Alioze manaa te kulia chipema. Yehova kanakalinga chikomokeso hanga ehe manaa. Yehova kanakalinga nawa chikomokeso hanga ehe nawa meya. Alioze atu te keshi kusakwilila kuli Zambi ha chize iye te akwafunga. Kashika Yehova yatuma tupela hanga asume A-Izalele. Tupela yasuma atu, anji a kuli ayo yafwa.

Mba hi atu yeza kuli Mose ni kwamba ngwo: ‘Yetwe twavulumuna, mumu twahanjika ni kulimika ni Yehova ni kuli yena. Haliapwila tulembele kuli Yehova hanga achize tupela wano.

Chocho Mose yalemba ha kutwala kuli atu jacho. Mba Yehova yatuma Mose hanga alinge kapela yono wa unengu. Yehova yamulweza ngwo amulimbe ku mutondo, hanga amutale kuli mweswao yoze te mamusuma kuli kapela. Mose yalinga nikulita ni chize Zambi amutumine. Kashika, atu waze te maasuma kuli kapela, muze ayo matala kuli kapela wa unengu mba mahinduka.

Lino lili limwe longeso kuli yetwe. Yetwe eswe, tuli ngwe A-Izalele waze anakasuma kuli tupela. Mumu yetwe eswe mwono wetu uli wa mashimbu akehe. Tala sali ni sali, mumona atu chize anapu tushinakaji, anayiza nawa kanafu. Ayino yeswe yinasoloka mumu lunga ni pwo mutangu, mwe Alama ni Eva, kanakehuka kuli Yehova, kashika ni yetwe eswe tunamono lamba, mumu tuli ana jo. Alioze Yehova hanalinga chimwe chuma hanga yetwe tuhase kupwa ni mwono wa miaka yeswe.

Yehova yatuma Mwanenyi, Yesu Kristu, hano hashi. Yesu kanakamuzeleka ha mutondo, mumu atu anji te akunyonga ngwo iye mutu mupi. Alioze Yehova kanakatuma Yesu hanga atulamwine. Nyi yetwe twatala kuli iye, ni kumukaula mutuhasa kupwa ni mwono wa mutolo. Alioze mutukalilongesa hakutwala ku yuma yino yeswe kulutwe.