HAPEU nyipi une jë kö caha ka ewath la sinöe? Ohea. Une kopa. Hnei Iehova hna upi Mose troa athip hune la sinöe la une kopa, matre troa goeëne ej hnene la nöj, nge thaa tro kö angatr a mec. Ngo itre nyipi une pe cahu itre ka wewë hune ihnadro. Kola wezipo la itre atr hnene itre ej hna hej. Pine nemen?

Pine laka, hnene la nöj hna qaja angazo Akötresie me Mose. Hnei angatr hna eetr, me hape: ‘Pine nemen matre epuni a xomi hun qaa Aigupito troa meci e celë ngöne la hnapapa? Pëkö xen me timi e celë. Nge xele hë huni ma xeni mana.’

Ngo ka lolo catr la mana. Hnei Iehova hna hamën ej koi angatr, jën la ketre iamamanyikeu. Nge hna tune mina fe göne la tim. Ngo pëkö mekun ne la nöj, troa hane olen kowe la aqane thupë angatre hnyawa hnei Akötresie. Haawe, Iehova a nue la itre un ka ihej, troa nyithupene lai kowe la itretre Isaraela. Kola heji angatr hnene la itre un, nge nyimutre la itre ka mec.

Ame hë la pun, kola tro la nöj koi Mose me qaja ka hape: ‘Ngazo la thiina hun, ngöne laka, hne huni hna qaja angazo Iehova me nyipë. Pane thithi jë enehila koi Iehova, matre troa ananyin la itre une celë.’

Haawe, Mose a thithi jë thatraqane la nöj. Nge Iehova a upi Mose troa kuca la ketre une kopa. Nge Nyidrëti a upi Mose troa athip ej, nge ame la nyin koi itre hna hej, tre ene la tro angatr a goeën la une kopa. Mose a kuca thenge la hna qaja hnei Akötresie. Nge ame asë hi lo itre hna hej, tre angatr a goeën la une kopa, ene pe paatre pi hi lo lai itre meci angatr.

Hetrenyi la ketre ini nyine tro sa xome qa ngöne la tulu celë. Ceitu së asë hi memine la itretre Isaraela, hna hej hnene la itre un. Itre ka tro asë hi së a mec. Goeëne xötreithi së jë, itre atr a qatre trootro, me mec. Celë hi pun ka ngazo, hne së asë hi hna kapa qa ngöne la hna thaa drengethenge hnei Adamu me Eva, hnei nyidroti hna triji Iehova. Ngo hnei Iehova hna hamën la ketre jën, matre ijiji së troa mele epine palua.

Hnei Iehova hna upe la Nekö i Nyidrë, Iesu Keriso kowe la fen. Ala nyimu la angetre atë hui nyidrë la thoi, ene pe athipi nyidrëti jë hnei angatr, hune la sinöe. Nyine amele së la kola nue gufa Iesu hnei Iehova. Maine tro së a goeë nyidrë, me xötrethenge la thupa ca i nyidrë, eje hi lai laka, tro hë së a hane hetrenyi la mele ka thaa ase palua kö. Tro pë hë së a wange hmaca pe e ketre ijin, la itre xaa mekun qa ngöne la pengöne celë.