E GATA dina beka e vivigi tu oqori ena kau? E sega. Na gata oqori e buli mai na parasa. A tukuna o Jiova vei Mosese me viviga na gata ena kau qai vakaduria mera raica na tamata ra qai bula kina. Ia era tu ena qele na gata dina. Era kati ira na tamata qai vakavuna nodra tauvimate. O kila na vuna?

Baleta nira vosavakacacataki Mosese kei na Kalou na Isireli. Era kudruvaka: ‘Na cava o kauti keimami tani kina mai Ijipita, me keimami mai mate tu ena vanua liwa qo? Ni sega e ke na kakana kei na wai. Keimami sa oca sara ga na kania tiko ga na mana.’

Ia e kakana vinaka na mana. E sega ni tu tu ga e kunei, o Jiova ga e vakarautaka vakacakamana, vaka kina na medra wai. Ia era sega ga ni vakavinavinaka vua ena nona karoni ira voli mai. Sa qai tala gona mai na gata batigaga mera totogitaki kina. E levu era mate nira laukati.

Lakolako era qai mai kaya vei Mosese: ‘Keimami sa ivalavala ca ena neimami vosa saqati Jiova kei iko. Masu mada vei Jiova me kauta tani na gata oqo.’

E masu o Mosese ena vukudra. E kaya o Jiova vei Mosese me cakava e dua na gata parasa qai viviga ena dua na kau, mera rai kina o ira na laukati. E cakava sara ga o Mosese na ka e kaya na Kalou, ra qai bulabula vinaka tale o ira na laukati nira sa raica na gata parasa.

Eda vulica e ke e dua na lesoni, nida vakataki ira sara ga na Isireli era a laukati. Eda sa tu oqo ena ituvaki leqataki. Eda dau raica ni sa kena ivalavala vei keda na tamata meda qase mai, da tauvimate qai mate yani. E baleta tiko ga na nodrau a gole tani mai vei Jiova na imatai ni tagane kei na yalewa, o Atama kei Ivi, o keda kece eda luvedrau. Ia e vakarautaka tu o Jiova e dua na sala meda rawa ni bula tawamudu kina.

O Jiova e tala mai na Luvena, o Jisu Karisito i vuravura. A qai vakoti ena dua na kau, ni levu era nanuma ni tamata ca. Ia e soli Jisu mai o Jiova me vakabulai keda. Eda na rawa ni bula tawamudu ke da rai vua da qai muri koya tale ga. Eda na qai vulica vakamalua.