¿SHIIMAIN saaʼin pümüin tü wüi sünainkat tü wunuʼukat? Nnojotsü shiimain. Aainjuushi süka cobre. Niʼitaainjatü Moisés sünain wanee wunuʼu naashin Jeʼwaa süpüla katüin noʼu na wayuu eirakaakana sümüin. Ayuuishii otta achotünüshii na israeliitakana sutuma wüi. ¿Pütüjaa aaʼu jamüsü sülataka tia?

Shia süka mojuin nanüiki na israeliitakana nümüin Maleiwa otta Moisés, namaka: ‹¿Jamüshii puʼuniraka waya Egiptojee süpüla ouktuinjanain waya isashiipaʼa? Nnojotsü eküülü otta wüin yaaya. Nnojoishii waya ekeein maná›.

Eküülü anasü tü manákat. Naapajala shia Jeʼwaa namüin sümaʼalee wüin. Nnojoishii talatüin na israeliitakana süka tü naainjakat Jeʼwaa napüleerua. Nuluwataaka Jeʼwaa wüi jashichi nanainmüin. Süchotoka otta ouktaka naya sutuma.

Mapa nantaka na israeliitakana eemüin Moisés, namaka nümüin: ‹Kaainjalashii waya, mojusü wanüiki nümüin Jeʼwaa otta pümüin. Paashajaa nümaa Jeʼwaa süpüla nüsünneʼerüin tü wüikalüirua›.

Naashajaaka Moisés nümaa Jeʼwaa napüleerua. Nuluwataaka Jeʼwaa Moisés sünain aainjaa shiyaakua wanee wüi süka cobre. Niʼitaainjatü shia sünain wanee wunuʼu süpüla neirakaain sümüin na süchotokana tü wüikat, naainjaka shia Moisés. Anaka na eirakaakana sümüin shiyaakua tü wüikat.

¿Kasa shikirajaka anain waya tüü? Wapüshuaʼa wayakana müshii waya maʼaka naaʼin na israeliita süchotokana wüi. Na wayuukana laülaashii, ayuuishii otta ouktushii. Alatüsü tia süka nükatalaain Adán otta Eva nuulia Jeʼwaa, nachonnii waya wapüshuaʼa. Nükaaliinjüin waya Jeʼwaa süpüla katüinjatüin woʼu waneepia.

Nuluwataain Jeʼwaa Mmapaʼamüin Jesucristo, nuʼutunaka aaʼin sünain wanee wunuʼu süka mojulaain nia naashin na wayuukana. Nuluwataain Jeʼwaa Jesús süpüla katüin woʼu. Weirakaale nümüin otta washatüle nukuwaʼipa kateerü woʼu waneepia. Mapa ekirajaweena waya süchiki tia.