Onyoka yongoporo
EHUNGI 41
Onyoka yongoporo
INDJO mai munika tjimuna onyoka yakatjiri ndja mangwa momuti? Oyo ka yakatjiri. Onyoka ya ungurwa pongoporo. Jehova wa raera Moses me itwe kotjihenḓe kokutja ovandu ve tare ku yo nu ve hupe. Nungwari ozonyoka zarwe nḓe ri pehi ozakatjiri. Ozo za rumata ovandu nu aze verisa. Ove mo tjiwa kutja omena ratjike?
Omena rokutja Ovaisrael va hungira ombirukira na Mukuru na Moses. Owo va unauna ave tja: ‘Ove we tu pitisira tjike moEngipte tu yekuṱira mokuti onguza? Imba kape novikurya nomeva. Nu eṱe twa urwa nokurya ovikurya mbi omana.’
Nungwari omana ovikurya oviwa. Jehova we ve pa momuano omuhimise. Nu wina we ve pa omeva mokutjita otjihimise. Nungwari ovandu kava ri nondangi komuano Mukuru mbwe ve ṱakamisa. Mena ranao Jehova wa hinda ozonyoka nḓa ozonawanga okuvera Ovaisrael. Ozonyoka ze ve rumata, nu ovengi va ṱa.
Korusenina ovandu ve ya ku Moses nave tja: ‘Eṱe twa tura ondjo, mena rokutja twa hungira ombirukira na Jehova na ove. Nambano kumba ku Jehova ma ise po ozonyoka nḓa.’
Okutja Moses wa kumbira otjiwaṋa. Nu Jehova wa raera Moses kutja nga ungure onyoka yongoporo. Eye we mu raera kutja nga twe kotjihenḓe, nu auhe ngwa rumatwa ma sokutara ku yo. Moses wa tjita otja Jehova tje mu raera. Nu ovandu mba rumatwa va tara konyoka yongoporo, nave veruka.
Eṱe matu yenene okurihongera kehungi ndi. Atuhe momuano umwe tu ri tjimuna Ovaisrael imbo mba rumatwa kozonyoka nḓo. Eṱe atuhe tu ri mongaro yokuṱa. Tara ongondoroka na ove, nu ove mo munu kutja ovandu ve kurupa, ve vera nu ve koka. Ihi omena rokutja omurumendu nomukazendu omutenga, Adam na Eva, va pirukira Jehova, nu eṱe atuhe oweṱe ovanatje vawo. Nungwari Jehova wa tjita omuano kokutja eṱe tu yenene okuhupa ngaaruhe.
Jehova wa hinda omuna we, Jesus Kristus kombanda yehi. Jesus wa paperwa kotjihenḓe, mena rokutja ovandu ovengi aave ripura kutja eye wa ri omundu omuvi. Nungwari Jehova wa yandja Jesus kutja me tu yame. Indu tji matu tara kuye, natu mu kongorere, matu kara nomuinyo waaruhe. Nungwari matu rihongo ovingi ohunga na imbi kombunda.
