NANCHI awe muloolo wapomba ku kichi ubena kumwekana nobe wa kine nyi? Ine. Uno muloolo bamubunjile na lubemba. Yehoba waambijile Mosesa amba amupombe ku kichi pa kuba’mba bantu bataleko ne kwikala bomi. Bino miloolo iji panshi yajinga ya kine. Yasumine bantu ne kwibabeleka. Abya wayuka kyalengejile nyi?

Ke na mambo a kuba’mba bena Isalela bamunenene Lesa ne Mosesa pamo. Bejizhañenye amba: ‘Mambo ka o mwitufumisha mu kyalo kya Ijipita amba tufwile muno mu kiselebwa? Mambo kechi muji kajo ne, ne mema nao kafwamo. Kechi twafwainwa kuja ano manna ne.’

Bino manna ajinga kajo kawama. Yehoba wibapeleo mu jishinda ja kukumya. Kabiji wibapele ne mema mu jishinda ja kukumya. Bino bano bantu kechi bajinga na lusanchilo pa bibalaminenga Lesa ne. Yehoba po po ebatumijile ino miloolo ya bulembe kuba’mba ibamanyike bena Isalela. Ibasumine bingi, kabiji bavula bafwile.

Kepo bantu baishile kwi Mosesa ne kwamba’mba: ‘Twalenga mambo, mambo twamunena Yehoba ne anweba pamo. Lombai kwi Yehoba amba, afumye miloolo ko tuji.’

Mosesa wibalombejileko bantu. Kabiji Yehoba waambijile Mosesa kubunda uno muloolo wa lubemba. Wamwambijile amba amwimike ku kichi, kabiji umvwe muntu ba musuma ku muloolo, wafwainwe kutala ku uno muloolo. Mosesa waubijile monka mwaambijile Lesa. Kabiji bantu bo basuminenga batajilenga ku uno muloolo wa lubemba ne kwikala ke batuntulu.

Ku kino twakonsha kufunjilako lufunjisho. Atweba bonse tuji byonka byajinga boba bena Isalela bo basumine ku yoya miloolo. Bonse tuji mu kizumba kya kufwa. Tumona bantu saka bakota, kubela, ne kufwa. Kiji bino mambo mwanamulume mutanshi Adama ne mwanamukazhi mutanshi Evwa basatukijile Yehoba, kabiji atweba bonse twi baana babo. Bino Yehoba wabikako jishinda ja kwitulengela kwikala myaka ne myaka.

Yehoba watumine Mwananji, Yesu Kilishitu, panopantanda. Yesu bamupopele pa kichi, mambo bantu bavula balangulukile’mba waji watama. Bino Yehoba wapaine Yesu kuba’mba etupulushe. Umvwe twatala kwi aye, ne kumulondela, po po tukatambula bumi bwa myaka. Bino tukafunda byavula pa uno mutwe.