ALYO kuna kumoneka ngwendi ezoka lyosili lina lidingire kositji ndi? Alyo kapisi lyosili. Alyo ezoka lyongoporo. Jehova kwa tanterere Mosesa asi a li ture kositji yipo vantu va tare kwalyo va twikire kuparuka. Nye mazoka ogo gana kara pevhu ago gosili. Ago kuna kuhuma vantu nokuvaveresa. Ono diva asi morwasinke?

Morwa Vaisraeli kwa tangwininine Karunga naMosesa. Awo kwa tangwinine asi: ‘Yinke wa tu gusira moEgipite tu ya fire momburundu omu? Amo mutupu nondya ndi mema. Ano ezi mana nazo zina tu seta.’

Nye mana nondya donongwa. Jehova kwa zi va pere pasitetu. Ano age kwa va pere hena mema pasitetu. Nye vantu kapi vana kara norupandu konkedi ezi a va pakere Karunga mbili. Jehova yipo nye ana tumu mazoka aga gouhungu mokutengeka Vaisraeli. Mazoka taga va humu, ano wovanzi tava fu.

Vantu makura tava wiza kwaMosesa nokutanta asi: ‘Ose tuna zono pokuuyungatu vyuke Jehova nove. Ngesi tu kandererera kwaJehova a tu guse aga mazoka.’

Makura Mosesa ta kandererere mo vantu. Ano Jehova ta tantere Mosesa a rugane ezoka lyongoporo eli. Age kwa tente asi a li ture kositji, ano nkenye gumwe ana humwa ga kona kutara kwalyo. Mosesa ta rugana yeeyi ga mu tanterere Karunga. Ano vantu ava va humwine tava tara kezoka lyongoporo makura tava veruka.

Apa pana kara sirongwa esi natu lirongera po. Monkedi zongandi, natuvenye kwa fana ngwendi Vaisraeli vena va humwine komazoka. Natuvenye kuna kara momukaro gokufa. Tara nakunye, no mona asi vantu kukurupa tava vere nokufa. Eyi kwa karera po morwa mugara nomukadi wokuhova, Adamu naEva, kwa suwurukwire Jehova, ano ose natuvenye vana vawo. Nye Jehova kwa tura po mpito asi tu vhure kuparuka narunye.

Jehova kwa tumine Munwendi Jesus Kristusa pevhu. Jesus kwa mu zenzeresere kositji, morwa vantu wovanzi kwa gazarere asi age mudona. Nye Jehova kwa geve Jesus a ya tu parure. Nsene ose tu tara kwendi, tu mu kwame, kuvhura nye tu kare nomwenyo gwanarunye. Nye ngatu lironga yoyinzi kuhamena eyi konyima.

Numeri 21:4-9; Johanesa 3:14, 15.