Chihande 41

Linoka waUnengu

UNO linoka nalijingi kuchitondo wambwende tahi? Nduma. Ou linoka wakutenga naunengu. Yehova alwezele Mose amuhake kuchitondo mangana vatu hakumutala vakayoye. Oloze manoka veka vali hamavu vambwende. Vanasumu vatu nakuvavijisa. Unejiva chinalingisa ngocho tahi?

Mwomwo vaIsalele vanatatwokesa Kalunga naMose. Vanakuyayavala ngwavo: ‘Munatulowela ika muEjipitu tufwile mupambo? Kakweshi kulya chipwe meyako. Tunakwivwa unyengwe kulya lika mana.’

Oloze mana hikulya chamwaza. Yehova navahanecho mujila yakukomwesa. Navahane nameya mujila yakukomwesa. Oloze vatu kavate kumusakwilila Kalunga havyuma navalingila. Shikaho Yehova hikutuma manoka vaulembe avazangamise vaIsalele. Manoka hikuvasuma kaha vavavulu vanafu.

Jino vatu hikwiza kuli Mose nakwamba ngwavo: ‘Tunavulumuna, mwomwo tunatatwokesa Yehova nayove. Achilombe kuli Yehova mangana atufumise manokava.’

Mose hikuvalombelako vatu. Yehova himwalweza Mose atenge linoka waunengu. Himwamulweza kumuhaka kuchitondo, kaha mutu vanasumu atela kutalako. Mose himwalinga mwanahanjika Kalunga. Kaha vatu vanasumuwa hikutala kulinoka waunengu nakuyoya cheka.

Hano hali chuma twatela tulinangule. Tuvosena, tuli nge vaIsalele vaze vasumine kumanoka. Tuli muchisemwa chakuya nakufwa. Achitale kanawa, vatu vali nakushinakajiwa, kuviza, nakufwa. Mwomwo valunga napwevo vakulivanga, vaAlama naEve, vafumine kuli Yehova, kahetu tuvana vavo. Oloze Yehova natuwahishila jila yakukatwama haya myaka yosena.

Yehova atumine Mwanenyi, Yesu Kulishitu, hamavu. Yesu vamusukikile hachitondo, mwomwo vatu vavavulu vamumwene nge wamupi. Oloze Yehova atuhanyine Yesu atulwile. Nge natutala kuli ikiye nakumukavangiza, kaha natutwama myaka namyaka. Kanda numba tulinangule vyavivulu hachuma kanechi.

Kulava 21:4-9; Yowano 3:14, 15.