¿AXTOKPETZULO kan, moqa lobʼaj aju tok tiʼj tzeʼ? Nya ax. Bʼinchamaj tukʼe kʼuxbʼil. Tzaj tqʼamaʼn Jehová te Moisés tuʼn tjaw tqʼoʼn kan lu tiʼj tzeʼ, tuʼntzun miʼ che kyim xjal aj tok kykeʼyin. Atzun qe kan ateʼku twitz txʼotxʼ, itzʼqeʼ. E ok txʼaʼn qe xjal kyuʼn ex e yabʼte kyuʼn. ¿Bʼiʼn tuʼne tiquʼn?

Tuʼnjo e ok ten aj Israel yolil mya bʼaʼn tiʼj Dios ex tiʼj Moisés. Tzaj tuj kywitz ex kyqʼama: ‹¿Tiquʼn o etz tiʼna tuj Egipto noq tuʼn qbʼaj kyime tuj tzqij txʼotxʼ? Mintiʼ qkʼaʼ aʼ ex mitiʼ qwa tzalu. Nya qajtle tuʼn qwaʼne tiʼj maná lu›.

Tbʼaneltoq wabʼj te maná. Naq tuʼn tipumal Jehová otaq tzaj tqʼoʼn kye. Ax ikx naq tuʼn tipumal otaq tzaj tqʼoʼn aʼ. Mitiʼx xi kyqʼoʼn aj Israel chjonte te Dios tuʼnju oteq che ok t-xqʼuqin. Tuʼntzunju, tzaj tsamaʼn Jehová qeju kan lu te kykastiw aj Israel. Nim qe xjal e ok txʼaʼn kyuʼn qe kan, tuʼntzujo nim qeʼ e kyim.

E pontzen aj Israel tukʼil Moisés ex xi kymaʼn te: ‹Ma qo bʼinchane il tuʼnju ma qo yoline mya bʼaʼn tiʼj Dios ex tiʼja. Kubʼsana te Jehová tuʼn kyel tlaqʼbʼaʼn qe lobʼaj qiʼje›.

Oktzen ten Moisés naʼl Dios kyiʼj. Ex tzaj tqʼamaʼn Jehová te Moisés tuʼn tkubʼ tbʼinchaʼn aju kan kʼuxbʼel ttxʼotxʼil. Ax ikx tzaj tqʼamaʼn te tuʼn tjaw tqʼoʼn tiʼj jun tzeʼ, tuʼntzen tok kykaʼyin kykyaqil qeju otaq chi ok txʼaʼn kyuʼn kan. Kubʼtzun tbʼinchen Moisés ikxix tzaʼnj oteq tzaj tmaʼn Dios te. Aqejo otaq che ok txʼaʼn kyuʼn qe kan xi kykiʼn aju tilbʼilal kan ex mitiʼtl e kyim.

Ntzaj tyekʼin jlu jun xnaqʼtzbʼil qe. Ik qten ik seʼn qe aj Israel aʼyejo i ok txʼaʼn kyuʼn kan. Tuʼnjo el kypaʼn kyibʼ Adán tukʼe Eva tiʼj Jehová, qkyaqilx nqo tijen nqo yabʼte ex nqo kyim. O bʼant jun tiʼ tuʼn Jehová, tuʼntzun qanqʼin te jun majx.

Tzaj tsamaʼn Jehová tKʼwaʼl tzala twitz Txʼotxʼ, aju Jesucristo. Jaw qʼoʼn Jesús twitz jun tzeʼ tuʼnjo nim xjal kubʼ t-ximin qa mya bʼaʼn xjaltoq te. Atzunte Jehová tzaj tqʼoʼn tkʼwal tuʼn qklet tuʼn. Qa ma tzʼok qʼuqeʼ qkʼuʼj tiʼj ex qa ma qo ok lepeʼ tiʼj, jaku ten qanqʼibʼil te jumajx. Yajxitl kʼelel mastl qnikʼ tiʼj jlu.