Historia 41

Kouatl tlachijchiujtli ika cobre

¿YEMELAK kouatl tlen mamatilijtika ipan kojtli? Ka. Tlachijchiujtli ika cobre. Jehová okijli Moisés makitlali ipan se kojtli niman ijkon tlaltikpakchanejkej mauelikan makitakan niman maka mamikikan. San ika, oksekimej kouamej tlen nemij ipan tlajli kema yemelak kouamej. Okinkuajkej niman okokoxkatikej tlaltikpakchanejkej. ¿Tikmatstika tleka?

Pampa israelitas okixnamijkej toTajtsin niman Moisés. Kijtouaj: ‘¿Tleka otitechuajkixti Egipto niman ijkon matimikikij ipan tlaluaktli? Nikan xtlaj tlakuajli nion atl. Xok tiknekij tijkuaskej maná’.

Maná melak uelik tlakuajli. Jehová okinmakak ika se milagro. Noijki ika se milagro okinmakak atl. San ika, tlaltikpakchanejkej xkitlasojkamatij tlen toTajtsin yokinmakak. Ika yejon, Jehová kinkauilia matlajyouikan, ijkuak kintitlani kouamej akin tekuaj, niman kichiuaj miyekej mamikikan.

Kuakon israelitas uajlauej itech Moisés niman kijliaj: ‘Yotitlajtlakojkej pampa tlemach xkuajli yotikijtokej itech Jehová iuan motech. Xchiuili teoyotl Jehová niman makinpopolo yejuin kouamej’.

Kuakon Moisés kichiua teoyotl inpampa. Niman Jehová kijlia Moisés makichijchiua yejuin kouatl ika cobre. Kijlia makitlali ipan se kojtli, niman nochimej akin okinkua se kouatl noneki makonita. Moisés kichiua ijkon ken toTajtsin kijlia. Kuakon akin okinkuajkej, konitaj kouatl tlachijchiujtli ika cobre niman xmikij.

Yejuin techmachtia ika tejuamej noijki ijkon tinemij ken israelitas, akin okinkua kouatl. Xkimita kenon nochimej tlaltikpakchanejkej ueuentsintiaj, kualoj niman mikij. Yejuin panoua pampa kachtopa tlakatl niman siuatl, Adán iuan Eva, okitlalkauijkej Jehová, niman tinochimej intech tiualeuaj. San ika, Jehová okitlapo se ojtli niman ijkon matinemikan nochipa.

Jehová okuajtitlan ikoneuj Jesucristo ipan tlaltikpaktli. Jesús okipilojkej ipan se kojtli melaktik, pampa miyekej kinemiliayaj ika yejua xkuajli katka. San ika, Jehová okitemakak Jesús niman ijkon techmakixtis. Tla tikchiuaj ken yejua, kentla tikonitstoskiaj, uelis tikpiyaskej nemilistli tlen xkeman tlamis. Ika tlayekapan tiueliskej itech yejuin.

Números 21:​4-9; Juan 3:14,15.