Enjoka y’Omuringa
Ekitebyo 41
Enjoka y’Omuringa
EGYO eyezingiriire aha kikondo neereebeka nk’enjoka yonyine? Tiyo. Enjoka egyo ekozirwe omu muringa. Yehova akagambira musa okugihanika aha kikondo kugira ngu abantu babaase kugireeba kandi bagume bahuriire. Kwonka ezindi njoka eziri ahansi zo n’eza buzima. Niziruma abantu kandi zibarwaza. Noomanya ahabw’enki?
N’ahabw’okuba Abaisraeli beetomboitaire Yehova na Musa. Nibeetomboita bati: ‘Ahabw’enki mwatwihire omuri Misri kufeera hanu omu ihamba? Tihariho eby’okurya nari amaizi. Kandi tutamirwe kurya emaanu.’
Kwonka emaanu n’eby’okurya birungi. Yehova abibahaire omu muringo gw’okutangaaza. Kandi arikukora eky’okutangaaza, abahaire n’amaizi. Kwonka abantu tibarikusiima omuringo gu Ruhanga arikubareebereramu. N’ahabw’ekyo, Yehova ayohereza enjoka z’obushegu kufubira Abaisraeli. Enjoka zibaruma, kandi baingi aharibo bafa.
Aha muheru abantu baija ahari Musa bamugira bati: ‘Tusiisire, ahabw’okuba turogotsire ahari Yehova hamwe n’ahariiwe. Hati tushabire ahari Yehova atwiheho ezi njoka.’
Atyo Musa ashabira abantu. Kandi Yehova agambira Musa okukora egi njoka y’omuringa. Amugambira kugita aha kikondo, kandi ngu buri omwe oraarumwe enjoka agihangye amaisho. Musa akora nk’oku Yehova yaamugambiire. Kandi abantu abaabaire barumwa enjoka, amaisho bagahanga enjoka y’omuringa batyo bakira.
Hariho eky’okwega kirungi omuri eki. Itwe twena, omu muringo nigwo gumwe, turi nk’abo Baisraeli abaarumirwe enjoka. Twena nitufa. Yetegyereze abakwetoroire, kandi noija kureeba ngu abantu boona nibakaikura, barwara, kandi bafa. Eki n’ahabw’okuba omushaija n’omukaza ab’okubanza, Adamu na Haawa, bakagomera Yehova, kandi twena turi abaana baabo. Kwonka Yehova atuhaire omuhanda ngu tubaase kugamaho ebiro byona.
Yehova akoohereza Omwana we, Yesu Kristo, omu nsi. Yesu akahanikwa aha muti, ahabw’okuba abantu baingi bakaba nibateekateeka ngu ni mubi. Kwonka Yehova akatuha Yesu okutujuna. Ku turamwikiririzemu, twamukuratira, obwo nitwija kutunga amagara agatahwaho. Kwonka nitwija kwega ahari eki bwanyima.
Okubara 21:4-9; Yohaana 3:14, 15.
