ЦӔДЖЫНДЗЫЛ цы калм ӕртыхст, уый ӕцӕг калм у? Нӕ. Уыцы калм ӕрхуыйӕ конд у. Иегъовӕ Моисейӕн загъта, зӕгъгӕ, ӕрхуы калм цӕджындзыл бафидар кӕн, цӕмӕй йӕм адӕм кӕсой ӕмӕ ма амӕлой. Фӕлӕ, зӕххыл цы кӕлмытӕ рабыр-бабыр кӕны, уыдон ӕцӕг кӕлмытӕ сты. Кӕуыл фӕхӕцынц, уый йӕ сӕрӕн нал вӕййы. Зоныс ӕй, цӕмӕн?

Уымӕн ӕмӕ израилӕгтӕ дзурынц Хуыцау ӕмӕ Моисейы ныхмӕ. Уыдон хъуыр-хъуыр кӕнынц: «Египетӕй нӕ ацы ӕдзӕрӕг быдырмӕ мӕлӕты дзыхмӕ цӕмӕн ӕркодтай? Нӕдӕр дзы хӕринаг ис, нӕдӕр дон. Ацы маннӕ та нӕ бон нал у хӕрын».

Ӕцӕгӕй та маннӕ тынг хӕрзад хӕринаг у. Иегъовӕ сын ӕй диссаджы хуызы дӕтты. Афтӕ ма сын диссаджы хуызы дӕтты дон дӕр. Фӕлӕ адӕм бузныг не сты Хуыцауӕй, кӕй сыл тыхсы, уымӕн нӕ аргъ кӕнынц. Уымӕ гӕсгӕ Иегъовӕ афтӕ сарӕзта, ӕмӕ израилӕгтыл маргджын кӕлмытӕ хӕцын райдыдтой. Сӕ хӕстӕй бирӕтӕ мӕлынц.

Фӕстагмӕ адӕм ӕрбацыдысты Моисеймӕ ӕмӕ йын лӕгъстӕ кӕнынц: «Иегъовӕйы ныхмӕ ӕмӕ дӕ ныхмӕ кӕй дзырдтам, уымӕй тӕригъӕд ракодтам. Скув ма Иегъовӕмӕ, цӕмӕй ацы кӕлмыты фесафа».

Моисей скуывта адӕмы тыххӕй. Ӕмӕ раст уӕд загъта Иегъовӕ Моисейӕн, цӕмӕй ӕрхуыйӕ калм скӕна, цӕджындзыл ӕй бафидар кӕна, ӕмӕ калм кӕуыл фӕхӕца, уыдонӕй йӕм алчидӕр кӕса. Хуыцау куыддӕриддӕр загъта, афтӕ бакодта Моисей. Калм-иу кӕуыл фӕхӕцыд, уый-иу ӕрхуы калммӕ куы скаст, уӕд-иу адзӕбӕх.

Ацы цау зондзонӕн у махӕн. Алчидӕр нӕ цӕмӕйдӕр у, кӕлмытӕ кӕуыл фӕхӕцыдысты, уыцы израилӕгты хуызӕн. Абон уа ӕви райсом уа, адӕм иууылдӕр кӕнынц мӕлгӕ. Дӕ алыварс куы акӕсай, уӕд фендзынӕ, адӕм кӕй зӕронд кӕнынц, кӕй рынчын кӕнынц, ӕмӕ ӕппынфӕстаг кӕй амӕлынц. Уый уымӕн афтӕ у, ӕмӕ фыццаг лӕг ӕмӕ ус, Адам ӕмӕ Евӕ, сӕхи атигъ кодтой Иегъовӕйыл, ӕмӕ мах та стӕм сӕ сывӕллӕттӕ. Фӕлӕ нын Иегъовӕ дӕтты ӕнустӕм цӕрыны фадат.

Уый зӕхмӕ ӕрӕрвыста йӕ Фырт Йесо Чырыстийы. Йесойы ӕрцауыгътой цӕджындзыл, уымӕн ӕмӕ йӕ бирӕтӕ нымадтой ӕвзӕр адӕймагыл. Ӕцӕгӕй та Иегъовӕ радта Йесойы мӕлӕтмӕ мах фервӕзын кӕныны тыххӕй. Уӕдӕ Йесомӕ куы кӕсӕм, йӕ фӕдыл куы цӕуӕм, уӕд цӕрдзыстӕм ӕнустӕм. Уый тыххӕй фылдӕр базондзыстӕм фӕстӕдӕр.