E KOLEBRA lorá rònt di e palu ei no ta parse di bèrdat? Pero e no ta di bèrdat. E ta un kolebra trahá di koper. Yehova a bisa Moisés pa kolog’é na e palu pa e pueblo por wak e i sigui biba. Pero tur e otro kolebranan abou na suela ta di bèrdat. Nan a morde hende i a hasi nan malu. Bo sa pakiko?

Esei ta dor ku e israelitanan a papia kontra Dios i Moisés. Nan a keha: ‘Pakiko bo a trese nos for di Egipto pa nos muri aki den desierto? No tin ni awa ni kuminda. I nos no por soportá di kome mana mas.’

Pero mana tabata bon kuminda. Yehova a duna nan mana dor di un milager. I dor di un milager el a duna nan awa tambe. Pero e pueblo no a mustra gratitut pa e manera ku Dios a kuida nan. P’esei Yehova a manda kolebra venenoso pa kastigá e israelitanan. Kolebra a morde nan, i hopi di nan a muri.

Finalmente e pueblo a bini serka Moisés i a bisa: ‘Nos a peka dor ku nos a papia kontra Yehova i kontra bo. Awor, pidi Yehova kita e kolebranan ei.’

P’esei Moisés a hasi orashon pa e pueblo. I Yehova a bisa Moisés pa traha e kolebra di koper ei. El a bisa pa kolog’é riba un staka, i ken ku kolebra a morde mester a wak e. Moisés a hasi nèt loke Dios a bisa. I e hendenan ku kolebra a morde a wak e kolebra di koper i nan a bira bon atrobe.

Tin un lès pa siña for di esei. Den un sentido nos tur ta meskos ku e israelitanan ku kolebra a morde. Nos tur ta muribundo. Tuma nota i bo por mira ku hende ta bira bieu, ta bira malu i ta muri. Esei ta dor ku e promé hòmber i muhé, Adam i Eva, a apartá nan mes for di Yehova, i nos tur ta nan yunan. Pero Yehova a habri kaminda pa nos por biba pa semper.

Yehova a manda su Yu, Hesukristu, na mundu. Nan a kologá Hesus na un staka, pasobra hopi hende a kere ku e tabata un mal hende. Pero Yehova a manda Hesus pa salba nos. Si nos akudí na dje, si nos siguié, nos por gana bida eterno. Pero, nos lo siña mas tokante esei despues.

Numbernan 21:4-9; Juan 3:14, 15.