41 yachachiy

Broncemanta katari

¿KAY kʼaspipi mintʼusqa katari kawsachkanchu? Mana. Broncemanta ruwasqa. Jehová Moisesta chayta ruwananpaq kamachirqa, jinamanta runa chayta qhawaspa mana wañunanpaq. Pampapi kaq katarikunaqa kawsachkanku. Runata khanispa unquchichkanku. ¿Yachankichu imaraykuchus?

Israelitakuna Diospaq Moisespaq ima thutusqankurayku. Jinatataq nirqanku: ‘¿Imapaqtaq Egiptomanta kay chʼin pampapi wañunaykupaq urqhumuwaykuri? Kaypi mana mikhuna, nitaq yakupis kanchu. Kay maná nisqapis amisqataña amiwayku’, nispa.

Chaywanpis maná nisqaqa sumaq mikhuna karqa. Jehová milagrota ruwaspa, manata, yakuta ima qurqa. Chaywanpis paykunaqa mana Jehovata pachis nirqankuchu. Chayrayku Jehová kay wañuchiq katarikunata kachamurqa. Katarikunaqa khanispa runata wañuchirqa.

Chaymantaraq runaqa Moisesman jamuspa nirqanku: ‘Ñuqayku juchallikuyku, Jehovap contranta, qampa contraykita parlaspa. Jehovamanta mañapuwayku, kay katarista chinkachinanpaq’, nispa.

Chayrayku Moisesqa paykunapaq mañapurqa. Jehovaqa Moisesta broncemanta katarita ruwaspa, kʼaspiman warkhunanta nirqa. Khanichikuqqa chayta qhawaspa mana wañunanpaq. Moisesqa Dios nisqanmanjina ruwarqa, khanichikuytawan broncemanta katarita qhawaqkuna allinchakurqanku, mana wañurqankuchu.

Kaymanta juk yachayta yachakusunman. Tukuy israelitajina khanisqa kanchik. Tukuy runapis machuyan, unqun, wañun ima. Kayqa Adán Evawan mana Diosta kasukusqankurayku. Tukuyninchiktaq paykunap wawan kanchik. Chaywanpis Jehovaqa juk ñanta kicharin wiñaypaq kawsananchikpaq.

Jehovaqa churinta Jallpʼaman kachamurqa. Runaqa Jesucristo saqra kasqanta yuyaspa kurkupi warkhuspa wañuchirqanku. Jehová Jesusta kacharichinawanchikpaq kachamurqa. Payta qhawaptinchik, qhatiptinchik ima wiñay kawsayta tarisunchik. Aswan qhipaman chaymanta yachasunchik.

Números 21:4-9; Juan 3:14, 15.