LÁ NAKUJMAA asndu xóo mbáa a̱bu̱nʼ bi̱ ndaʼya bi̱ kuningaraʼa náa ixi̱ ráʼ. Na̱nguá eʼya. A̱bu̱nʼ bugi̱ ki̱ʼni̱i̱ ga̱jma̱a̱ cobre. Jeobá niʼthúu̱n Moisés rí makuxi̱i̱ náa ixi̱ mú ma̱ndoo mbuyáá xa̱bu̱ ga̱jma̱a̱ makuwá má xúʼko̱. Mú eʼwíínʼ a̱bu̱nʼ, bi̱ jngútigi̱i̱n mbayííʼ nduya. Xa̱bu̱ niʼñún nandii índo̱ rí a̱bu̱nʼ niʼphu̱u̱n ikhiin. Lá natayáá náa numuu ráʼ.

Numuu rí israelitas nitanumáá Dios ga̱jma̱a̱ Moisés. Nuxieʼkhá: ‹Náa numuu rí nitrawáanʼxu náa Egipto mú makhañúxu náa ku̱ba̱ʼ gíná rígi̱ rá. Gi̱i̱ nda̱a̱ ganitsu asndu má nda̱a̱ iyaʼ. Ga̱jma̱a̱ nánguá eyuxu gúphú má xúʼko̱ maná rígi̱›.

Mú maná ni̱ndxu̱u̱ mbá ganitsu májánʼ. Jeobá nixnúún ga̱jma̱a̱ mbá milagro. Ma̱ngaa iyaʼ nixnúún ga̱jma̱a̱ mbá milagro. Mú xa̱bu̱ na̱nguá guáʼdáá gamajkún rí xú káʼnii Dios niña̱wu̱u̱n. Ikha jngó Jeobá nakunguinʼ a̱bu̱nʼ bi̱ mbiinʼ xóo castigo náa israelitas. A̱bu̱nʼ bugi̱ naʼphu̱u̱n xa̱bu̱, ga̱jma̱a̱ mbaʼin xa̱bu̱ nakháñun.

Nda̱wa̱á kayuʼ xa̱bu̱ naguwáʼ náa Moisés ga̱jma̱a̱ nuthi: ‹Nikieʼkuxu, numuu rí nitanúmááxu Jeobá ga̱jma̱a̱ nitanúmaʼxu mangáán. Rí xúgi̱ aratakháñii Jeobá mu maʼni gámbi̱i̱n a̱bu̱nʼ bugi̱›.

Ikha jngó Moisés naʼtakháñuu Dios ga̱jma̱a̱ numún. Ikhú Jeobá naʼthúu̱n Moisés rí maʼnii a̱bu̱nʼ ga̱jma̱a̱ cobre. Naʼthúu̱n rí maningaraʼa náa mbá ixi̱, ga̱jma̱a̱ xa̱bu̱ bi̱ niʼphu̱u̱n gíʼmaa rí muyexi náa a̱bu̱nʼ. Moisés naʼni xóo má Dios eʼthí. Ga̱jma̱a̱ bi̱ niʼphu̱u̱n nduyáá a̱bu̱nʼ bi̱ ki̱ʼni̱i̱ ga̱jma̱a̱ cobre, ikhú xa̱bu̱ naʼni̱i̱nli.

Rígi̱ ma̱ndoo majmañulúʼ mbá ikha májánʼ. Xúgiáanʼ ikháanʼ nindxu̱lúʼ xóo israelitas buʼko̱. Atayáá xúgínʼ xa̱bu̱ naʼni wanii, ndañún nandii ga̱jma̱a̱ nakháñun. Rígi̱ narígá numuu rí timbáa xa̱biya̱ ga̱jma̱a̱ timbáa aʼgú, Adán ga̱jma̱a̱ Eva, ni̱ni̱ wajimijna náa Jeobá, ma̱ngaa xúgiáanʼ ikháanʼ nindxu̱lúʼ e̱ji̱i̱n ikhiin. Mú Jeobá naxná mbá rí ma̱ndoo makuwáanʼ kámuu.

Jeobá nikuʼmaa A̱ʼdióo Jesucristo náa tsu̱du̱u̱ Ku̱ba̱ʼ. Jesús nindrajkaa náa mbá ixi̱, numuu rí mbaʼin xa̱bu̱ nindxa̱ʼwa̱míjna̱ rí ikhaa ninindxu̱u̱ mixkawiʼ wéñuʼ. Mú Jeobá nixnáa Jesús mu ma̱ʼnikáwáánʼ. Á mu nuyexi náa ikhaa, na̱jkua̱ ki̱dxu̱ʼ, ma̱ndoo makuwáanʼ kámuu mbiʼi. Mú nda̱wa̱á majmañulúʼ itháan ga̱jma̱a̱ numuu rígi̱.