41-нҗи хекая

Мисден ясалан йылан

ШУ СУРАТДАКЫ узын таягың дашына оралан йылан хакыкы йылана меңзейәрми? Ёк, меңзәнок. Бу йылан мисден ясалан. Ехова Муса йыланы пүрсе беркитмеги табшырды. Адамлар оңа середип халас болмалыды. Ердәки йыланлар болса хакыкы йыланлар. Йыланлар адамлары чакып яралаярды. Бу затларың нәме үчин боляндыгыны билйәңми?

Себәби ысрайыллылар Худая ве Муса гаршы гахарландылар. Олар: «Сен бизи шу чөлде өлдүрмек үчин Мүсүрден чыкардыңмы? Бу ерде иере-ичере хич зат ёк. Бу маннаны биз инди ийип билҗек дәл» дийип зейрендилер.

Аслында, манна тагамлы иймитди. Ехова маннаны хем-де сувы гудрат билен берди. Йөне халк онуң гадырыны билмеди. Шол себәпли Ехова олары җезаландырмак үчин зәхерли йыланлары иберйәр. Йылан чаканда, оларың көпүси өлйәр.

Ахыры адамлар Мусаның янына гелип: «Биз Ехова ве саңа гахарланып гүнә этдик. Йыланлар айрылар ялы бизиң үчин Ехова дилег эдәй» дийип ялбарярлар.

Муса халк үчин Ехова дилег эдйәр. Мусаның дилегине җогап берип, Ехова мисден йылан ясамагы буюряр. Соңра шол йыланы пүрсе беркидип, йылан чакан хер бир адамың мисден ясалан йылана серетмегини табшыряр. Муса Худайың табшырыгыны эдил айдышы ялы-да эдйәр. Шейдип, йылан чакан адамлар мисден ясалан йылана середип сагаляр.

Бу бизе говы сапак болуп билер. Бизиң хеммәмиз йылан чакан ысрайыллылара меңзейәрис. Иң соңы хемме адамлар өлйәр. Даш төверегиңе гөз айласаң, адамларың гарраяндыгыны, кеселлейәндигини ве өлйәндигини гөрерсиң. Бу затлар Адам ата билен Хов энәниң Еховадан йүз өврени үчин боляр. Биз болса оларың чагалары. Эмма Ехова бизе эбеди яшамага мүмкинчилик берйәр.

Ехова Оглы Иса Месихи ере иберди. Көп адамлар Исаны эрбет адам хасаплап, оны пүрсе чүйледилер. Йөне Ехова бизи халас этмек үчин, Исаны өлүме берди. Эгер биз оңа середип, онуң ызына эерип билсек, онда эбеди яшап билерис. Бу барада биз индики баплардан көпрәк билерис.

Санлар 21:4—9; Яхя 3:14, 15.